ស្ថាប័ន​ត្រួតពិនិត្យអាកាសធាតុរបស់សហភាពអឺរ៉ុប (EU) នៅថ្ងៃ​ពុធ (ទី១០ ខែមិថុនា ឆ្នាំ​២០២៦)​ នេះ បាន​ឲ្យ​ដឹង​ថា ពិភពលោកបានជួបប្រទះនឹង​ខែឧសភាក្តៅបំផុតជាលើក​ទី២ ដោយ​អឺរ៉ុបរងឥទ្ធិពលពីរលកកម្ដៅលឿន​ខុសពី​ធម្មតា​ ខណៈដែលបម្រែបម្រួល​អាកាសធាតុបានក្លាយជា «ស្ថានភាពធម្មតាថ្មី» នៅទ្វីបអឺរ៉ុប។

កំណត់ត្រាត្រូវបានបំបែក នៅក្នុងប្រទេសអង់គ្លេស បារាំង អៀរឡង់ និងព័រទុយហ្គាល់ ក្នុងខែឧសភា ខណៈដែល​ខ្យល់ក្តៅបក់​ពីអាហ្វ្រិកខាងជើង បានជំរុញឲ្យ​សីតុណ្ហភាពឡើង​ខ្ពស់ជាងកម្រិតធម្មតា នៅទូទាំងអឺរ៉ុបខាងលិច។

ទីភ្នាក់ងារ​តាម​ដាន​បម្រែ​បម្រួល​អាកាសធាតុ Copernicus បានឲ្យ​ដឹង​នៅក្នុងព្រឹត្តិបត្រខែឧសភារបស់ខ្លួនថា៖ «ខែនេះត្រូវបានសម្គាល់ដោយការផ្លាស់ប្តូរយ៉ាងឆាប់រហ័សពីអាកាសធាតុ​ត្រជាក់ជាងមធ្យម ទៅជារលកកម្ដៅក្ដៅ​ខ្លាំងបំផុតមិនធ្លាប់មាន នាដើមឆ្នាំនេះ នៅអឺរ៉ុបខាងលិច»។

អ្នកដឹកនាំយុទ្ធសាស្ត្រ សម្រាប់អាកាសធាតុ នៅឯ​មជ្ឈមណ្ឌលអឺរ៉ុប សម្រាប់ការព្យាករអាកាសធាតុកម្រិតមធ្យម (ECMWF) ដែលដំណើរការទីភ្នាក់ងារ​ Copernicus គឺ​លោកស្រី Samantha Burgess បាន​និយាយថា៖ «រលកកម្ដៅលឿន​ និងខ្លាំងខុស​ពី​ធម្មតា បង្ហាញថា តើ​បម្រេបម្រួល​អាកាសធាតុ កំពុងក្លាយជាស្ថានភាពធម្មតាថ្មីយ៉ាងឆាប់រហ័ស មិន​មែន​ជា​ករណី​កើត​ឡើង​ដោយ​កម្រឡើយ​»។

ស្ថាប័ន Copernicus បានបញ្ជាក់​ថា សីតុណ្ហភាពជាក់ស្ដែង​ បានឡើងដល់ ៣៥អង្សាសេ ទៅ ៤០អង្សាសេ នៅទូទាំងតំបន់ធំៗនៃទ្វីបអឺរ៉ុប ហើយ​នៅទូទាំងពិភពលោក សីតុណ្ហភាពខ្យល់ជាមធ្យមលើផ្ទៃផែនដី បានឡើងដល់ ១៥,៨១អង្សាសេ ដែល​ជាប់លំដាប់​ទី ២ បន្ទាប់ពីខែឧសភា ឆ្នាំ២០២៤៕