ប្រទេស​ម៉ាឡេស៊ី និងជប៉ុន នៅ​ថ្ងៃពុធ (ទី១០ ខែមិថុនា ឆ្នាំ២០២៦) នេះ បានផ្ដល់​ការ​សន្យាដល់​គ្នា​ថា នឹងពង្រឹងកិច្ចសហប្រតិបត្តិការ ក្នុងវិស័យការពារជាតិ ការអភិវឌ្ឍសេដ្ឋកិច្ច សន្តិសុខថាមពល និងបច្ចេកវិទ្យាថ្មីៗ។

ការ​សន្យា​នេះបានកើតឡើងនៅពេលដែលនាយករដ្ឋមន្ត្រីម៉ាឡេស៊ី លោក Anwar Ibrahim បានជួបជាមួយសមភាគីជប៉ុនរបស់លោក គឺលោកស្រី Sanae Takaichi នៅទីក្រុងតូក្យូ។ អំឡុង​ពេល​ថ្លែងនៅក្នុងសន្និសីទសារព័ត៌មានរួមគ្នា លោក Anwa បានថ្លែងអំណរគុណដល់ប្រទេសជប៉ុន ចំពោះមិត្តភាព និងការគាំទ្រយូរអង្វែងរបស់ខ្លួន ដោយពណ៌នាអំពីការពិភាក្សា រវាងមេដឹកនាំទាំង ២ ថា ជា​ការ​ជជែក​ «ប្រកប​ដោយ​ផ្លែផ្កាខ្ពស់​»។

លោកបានបន្ថែម​ថា កិច្ចពិភាក្សានេះគ្របដណ្តប់លើសន្តិសុខការពារជាតិ និងដែនសមុទ្រ ឧស្សាហកម្មយុទ្ធសាស្ត្រ ការផ្លាស់ប្តូរថាមពល កិច្ចសហប្រតិបត្តិការហិរញ្ញវត្ថុ ការអភិវឌ្ឍធនធានមនុស្ស និងបញ្ហាក្នុងតំបន់។ ជាមួយ​គ្នា​នេះ លោក Anwar បានបញ្ជាក់ជាថ្មីនូវការប្តេជ្ញាចិត្តរបស់ម៉ាឡេស៊ី ក្នុងការពង្រីកកិច្ចសហប្រតិបត្តិការដែនសមុទ្រជាមួយជប៉ុន ក្នុង​នោះ​រួមទាំងកិច្ចសហការជាបន្តបន្ទាប់ក្រោមក្របខ័ណ្ឌជំនួយសន្តិសុខផ្លូវការ (OSA) របស់ជប៉ុន និងអនុស្សរណៈ ស្តីពីសុវត្ថិភាព និងសន្តិសុខដែនសមុទ្រ។

ហើយ​បើយោងតាមសារព័ត៌មាន Kyodo News បាន​ឲ្យ​ដឹង​ថា ប្រទេសទាំង២ បានព្រមព្រៀងគ្នាពង្រឹងកិច្ចសហប្រតិបត្តិការ លើសន្តិសុខថាមពល ក្នុង​នោះ​រួមទាំងការផ្គត់ផ្គង់ឧស្ម័នធម្មជាតិរាវ (LNG) ខណៈដែលប្រទេសជប៉ុនកំពុងស្វែងរកការធ្វើពិពិធកម្មប្រភពថាមពលរបស់ខ្លួន ក្នុង​អំឡុង​ពេលមានភាពតានតឹង ទាក់ទងនឹងជម្លោះ នៅតំបន់មជ្ឈិមបូព៌ា។

ចំណែក​លោកស្រី​ Takaichi បាននិយាយថា លោកស្រី និង​លោក Anwar ក៏បានពិភាក្សាផង​ដែរ អំពីការពង្រឹងកិច្ចសហប្រតិបត្តិការលើការពង្រឹងខ្សែសង្វាក់ផ្គត់ផ្គង់សម្រាប់រ៉ែសំខាន់ៗ ខណៈពេលដែលធ្វើការជាមួយប្រទេស និងស្ថាប័នដែលមានគំនិតដូចគ្នា។

ភាគីទាំង២ ក៏បានចុះហត្ថលេខាផង​ដែរ លើអនុស្សរណៈយោគយល់គ្នាចំនួន ៥ ស្តីពីសន្តិសុខថាមពល សុវត្ថិភាពផ្លូវសមុទ្រ និងនិរន្តរភាពបរិស្ថានផងដែរ៕