ពលរដ្ឋម៉ាឡាវីរហូតដល់ ១៥០នាក់ បានវិលត្រឡប់មកកាន់ប្រទេសកំណើតវិញ ក្រោយចាកចេញពីខេត្ត Western Cape របស់អាហ្វ្រិកខាងត្បូង ក្រោមកម្មវិធីធ្វើមាតុភូមិនិវត្តន៍ដោយស្ម័គ្រចិត្ត ដឹកនាំដោយរដ្ឋាភិបាល ។

ប្រជាពលរដ្ឋទាំងនេះ បានធ្វើដំណើរទៅដល់ពហុកីឡដ្ឋាន Kamuzu ស្ថិតក្នុងទីក្រុង Blantyre ក្រោយធ្វើដំណើរតាមរថយន្តក្រុងឆ្លងកាត់ប្រទេសហ្ស៊ីមបាបវ៉េ និងប្រទេសម៉ូសំប៊ីក ក្នុងនោះការពន្យាពេលបានជំរុញឲ្យការមកដល់របស់ពួកគេមានការយឺតយ៉ាវបន្តិច ។

នៅពហុកីឡដ្ឋាន មន្រ្តីនគរបាលបានហៅឈ្មោះរបស់ពួកគេ ពេលដែលពួកគេតម្រង់ជួរចុះឈ្មោះ ។ ក្រុមមន្រ្តីសុខភាព បានពិនិត្យសុខភាពរបស់ពួកគេផងដែរ ខណៈមន្រ្តីអន្តោប្រវេសន៍ ធ្វើឯកសារ និងផ្តិតមេដៃរបស់ពួកគេ ។

ពលរដ្ឋវិលត្រឡប់មកវិញមួយចំនួននិយាយថា ពួកគេបានរត់ភៀសខ្លួនចេញពីស្ថានភាពដ៏អាក្រក់នៅអាហ្វ្រិកខាងត្បូង ។

អ្នកស្រី Clement Ndodo Hara គឺជាពលរដ្ឋម៉ាឡាវីវិលត្រឡប់មកវិញមួយរូបនិយាយថា ពេលដែលអ្នកគឺជាជនបរទេស មិនថាអ្នកមានអត្តសញ្ញាណនោះទេ ពួកគេនឹងធ្វើបាបអ្នក ។ មនុស្សមួយចំនួនមកពីទីក្រុង Limpopo នៅអាហ្វ្រិកខាងត្បូង ក៏ជាជនរងគ្រោះផងដែរ ។

ការធ្វើមាតុភូមិនិវត្តន៍នេះដែរ បានកើតមាន បន្ទាប់ពីសេចក្តីរាយការណ៍អំពើហិងហ្សា និងការបំភិតបំភ័យពាក់ព័ន្ធនឹងបាតុកម្មមានគោលដៅលើជនអន្តោប្រវេសន៍គ្មានឯកសារនៅអាហ្វ្រិកខាងត្បូង ៕