ក្រសួងការបរទេសអ៊ីរ៉ង់ នៅ​ថ្ងៃពុធ (ទី១០ ខែមិថុនា ឆ្នាំ២០២៦) នេះ បាន​បញ្ជាក់​ថា សហរដ្ឋអាមេរិកបានធ្វើឲ្យ​ខូចដល់កិច្ចប្រឹងប្រែងផ្នែកការទូតអន្តរជាតិដែលកំពុងបន្ត ដើម្បីបញ្ចប់សង្គ្រាម បន្ទាប់ពីមាន​ការវាយប្រហាររបស់សហរដ្ឋអាមេរិកបន្ថែមទៀត លើគោលដៅ នៅភាគខាងត្បូងនៃ​ប្រទេស​អ៊ីរ៉ង់។

នៅក្នុងសារវីដេអូមួយដែលផ្សាយដោយប្រព័ន្ធផ្សព្វផ្សាយអ៊ីរ៉ង់ អ្នកនាំពាក្យក្រសួងការបរទេស លោក Esmaeil Baqaei បានលើក​ឡើង​ថា៖ «ជារឿង​គួរ​ឲ្យ​សោកស្ដាយ​ណាស់​ សហរដ្ឋអាមេរិកកំពុងធ្វើឲ្យ​ខូចដល់ដំណើរការការទូតនេះ តាមរយៈសារផ្ទុយដែលខ្លួនផ្ញើមក​ ការផ្លាស់ប្តូរជំហរ និងការទាមទារម្តងហើយម្តងទៀត និងអ្វីដែលអាក្រក់បំផុតនោះ គឺ​តាមរយៈការរំលោភលើបទឈប់បាញ់ម្តងហើយម្តងទៀត»។

លោកបាន​បន្ថែម​ថា៖ «ដំណើរការការទូតណាមួយ ត្រូវបានខូចខាតដោយការប្រើប្រាស់កម្លាំង និងដោយការងាក​ទៅ​រកការ​ប្រើ​ប្រាស់​​វិធានការ​ខុសច្បាប់ លើ​ទីតាំង​ជាក់ស្ដែង​»។

គួរបញ្ជាក់ថា នៅក្នុងសេចក្តីថ្លែងការណ៍មួយនាព្រឹកថ្ងៃពុធនេះ​ យោធាអាមេរិកបានឲ្យដឹង​ថា ខ្លួនបាន «បញ្ចប់» ការវាយប្រហារសងសឹក លើ​អ៊ីរ៉ង់ ជុំវិញការបាញ់ទម្លាក់ឧទ្ធម្ភាគចក្រវាយប្រហារមួយគ្រឿង​។ បញ្ជាការកណ្តាលសហរដ្ឋអាមេរិក (CENTCOM) ដែលត្រួតពិនិត្យកងកម្លាំងអាមេរិក នៅតំបន់មជ្ឈិមបូព៌ា បានឲ្យ​ដឹង​នៅលើបណ្ដាញ​សង្គម X ថា ខ្លួនបាន «បញ្ចប់ការវាយប្រហារការពារខ្លួនប្រឆាំងនឹងអ៊ីរ៉ង់» ហើយ៕