​

គណបក្សបានប្រកាសនៅ​ថ្ងៃពុធ (ទី១០ ខែមិថុនា ឆ្នាំ២០២៦) ថា លោក Benjamin Netanyahu នឹងស្វែងរកការជាប់​ឆ្នោតឡើងវិញ នៅឆ្នាំនេះ បន្ទាប់ពីប្រធានាធិបតីអាមេរិក លោក Donald Trump បាននិយាយថា លោកមិនប្រាកដនោះឡើយ​ថា តើនាយករដ្ឋមន្ត្រីអ៊ីស្រាអែល នឹងឈរឈ្មោះម្តងទៀតដែរ ឬអត់​។

នៅក្នុងសេចក្តីថ្លែងការណ៍ខ្លីមួយ គណបក្ស Likud បានឲ្យ​ដឹង​ថា លោក Netanyahu នឹងឈរឈ្មោះនៅ​ក្នុង​ការ​បោះឆ្នោត ហើយប្រសិនបើព្រះជាម្ចាស់ប្រទាន​ពរ លោកនឹងឈ្នះការ​ប្រកួត​ប្រជែងនេះ​​។ ការបោះឆ្នោតនេះមិនទាន់ត្រូវបានប្រកាសជាផ្លូវការនៅឡើយទេ ប៉ុន្តែត្រូវតែធ្វើឡើងនៅខែតុលា។

នៅ​មុននេះ លោក Jonathan Karl អ្នកឆ្លើយឆ្លងព័ត៌មានរបស់ប្រព័ន្ធ​ផ្សព្វផ្សាយ​ ABC News ប្រចាំទីក្រុងវ៉ាស៊ីនតោន បានបង្ហោះនៅលើបណ្ដាញ​សង្គម X ថា លោក Trump បានប្រាប់លោកថា ខ្លួន​លោកផ្ទាល់​មិនដឹងនោះទេ​ថា តើ​លោក Netanyahu នឹងឈរឈ្មោះដែរ ឬអត់។ អ្នកសារព័ត៌មាន​រូបនេះ បានដកស្រង់សម្តីរបស់លោក Trump ដែល​បាន​និយាយ​ថា៖ «ខ្ញុំមិនដឹងនោះទេ គាត់ (លោក Netanyahu) មានអាជីពដ៏អស្ចារ្យ​។ តើគាត់ចង់បន្តដែរ ឬអត់​?»។

គួរបញ្ជាក់​ថា ការបោះឆ្នោតរបស់​អ៊ីស្រាអែល នឹងក្លាយ​ជាដំណើរ​ការ​លើកដំបូង គិត​ចាប់តាំងពីការវាយប្រហាររបស់ក្រុមហាម៉ាស កាល​ពី​ថ្ងៃទី៧ ខែតុលា ឆ្នាំ២០២៣ ដោយ​នេះ​គឺ​ជាការបរាជ័យផ្នែកសន្តិសុខដ៏អាក្រក់បំផុតរបស់ប្រទេសនេះ​ ខណៈ​ដែល​ហេតុការណ៍​នោះបានបង្កឲ្យ​មានការវាយប្រហាររបស់អ៊ីស្រាអែលលើតំបន់ហ្កាហ្សា៕