ប្រធានាធិបតីទួរគី លោក​ Recep Tayyip Erdogan បាននិយាយនៅ​ថ្ងៃពុធ (ទី១០ ខែមិថុនា ឆ្នាំ២០២៦) នេះថា វត្តមានរបស់លោកប្រធានាធិបតីអាមេរិក Donald Trump នៅក្នុងកិច្ចប្រជុំកំពូលរបស់​អង្គការ​ណាតូ (NATO) នៅទីក្រុង Ankara នាខែក្រោយ នឹងក្លាយជាពេលវេលាដ៏សំខាន់មួយ សម្រាប់ស្ថិរភាពរបស់​សម្ព័ន្ធមិត្តយោធានេះ​។

មេដឹកនាំទួរគីបានប្រាប់សមាជិកសភាមកពីគណបក្សកំពុងកាន់អំណាច AKP របស់លោកថា៖ «ការប្រកាស ដែល​ថា ប្រធានាធិបតីអាមេរិក Trump នឹងចូលរួមកិច្ចប្រជុំកំពូលដោយផ្ទាល់ គឺជាជំហានដ៏សំខាន់មួយ ទាក់ទងនឹងស្ថិរភាពរបស់សម្ព័ន្ធមិត្ត»។

គួរបញ្ជាក់ថា កាលពីសប្តាហ៍មុន រដ្ឋមន្ត្រីការបរទេសអាមេរិក Marco Rubio បានបញ្ជាក់ថា លោក Trump នឹងចូលរួមកិច្ចប្រជុំកំពូលថ្ងៃទី ៧-៨ ខែកក្កដា នៅរដ្ឋធានីរបស់​ប្រទេស​ទួរគី ខណៈដែលក្តីបារម្ភ នៅតែមាន អំពីការប្តេជ្ញាចិត្តរបស់ទីក្រុងវ៉ាស៊ីនតោន ចំពោះសម្ព័ន្ធភាពឆ្លងមហាសមុទ្រអាត្លង់ទិកមួយ​នេះ​។

លោក Erdogan បានបន្ថែម​ថា ប្រទេសទួរគី បានពង្រឹងការរៀបចំរបស់ខ្លួន «ដើម្បីធានាឲ្យ​បាន​ថា កិច្ចប្រជុំកំពូល Ankara ក្លាយជាពេល​វេលា​ដ៏​សំខាន់មួយ នៅក្នុងប្រវត្តិសាស្ត្ររបស់អង្គការ​ណាតូ​»។

ទំនាក់ទំនងក្នុងសម្ព័ន្ធភាពនេះ បាន​ស្ថិត​នៅក្នុង​ភាពអាប់អួយ៉ាងខ្លាំង ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមទម្លាក់គ្រាប់បែកលើអ៊ីរ៉ង់ កាល​ពី​ថ្ងៃទី២៨ ខែកុម្ភៈ។ រដ្ឋាភិបាលអឺរ៉ុបបានបដិសេធមិនចូលរួមនៅ​ក្នុង​សង្គ្រាមនេះ​ ដែលក៏ត្រូវបានជំទាស់ដោយទួរគីផងដែរ ដោយទីក្រុង Ankara កំពុងខិតខំប្រឹងប្រែង ដើម្បីបញ្ចប់ការប្រយុទ្ធគ្នានេះ៕