ប្រធានសិទ្ធិមនុស្សរបស់​អង្គការសហប្រជាជាតិ (UN) លោក Volker Turk បាននិយាយនៅ​ថ្ងៃពុធ (ទី១០ ខែមិថុនា ឆ្នាំ២០២៦) នេះ​ថា ការិយាល័យសិទ្ធិមនុស្ស UN នឹងដាក់ពង្រាយក្រុមអ្នកស៊ើបអង្កេត នៅ​លីបង់ នា​សប្តាហ៍ក្រោយ ដើម្បីវាយតម្លៃលទ្ធ​ភាព​ដែល​អាច​មាន​ការរំលោភបំពានច្បាប់អន្តរជាតិដោយ​ភាគីទាំងអស់ អំឡុងសង្គ្រាមបច្ចុប្បន្ននៅក្នុងប្រទេសនេះ​។

ប្រទេសលីបង់ត្រូវបានទាញឲ្យ​ធ្លាក់​ចូលទៅក្នុងជម្លោះមជ្ឈិមបូព៌ា កាលពី​ថ្ងៃទី២ ខែមីនា នៅពេលដែលកងជីវពលក្រុម​ហេបូឡា​ដែលគាំទ្រដោយទីក្រុងតេអេរ៉ង់ បានបាញ់រ៉ូ​កែតចូល​ទៅអ៊ីស្រាអែល ដើម្បីជា​ការ​បង្ហាញ​សាមគ្គីភាពជាមួយអ៊ីរ៉ង់ ដែលស្ថិតនៅក្រោមការវាយប្រហាររបស់សហរដ្ឋអាមេរិក-អ៊ីស្រាអែល ដោយ​ការ​ធ្វើ​បែប​នោះ​បាន​ជំរុញឲ្យ​មានយុទ្ធនាការដ៏ធំតាម​ផ្លូវអាកាស និងគោក​របស់អ៊ីស្រាអែល។

លោក Turk បាននិយាយថា៖ «នេះជាលើកដំបូងដែលយើងកំពុងបញ្ជូនបេសកកម្មវាយតម្លៃនេះ ហើយគំនិតនេះ គឺពិតជាដើម្បីពិនិត្យមើលការរំលោភបំពានពី​គ្រប់ភាគី ដែល​មាន​ការរំលោភច្បាប់អន្តរជាតិ ការរំលោភច្បាប់សិទ្ធិមនុស្សអន្តរជាតិ និងដើម្បីកត់ត្រារឿងនេះ និងនៅទីបំផុត ដើម្បីរាយការណ៍មកអ្នកវិញ អំពីការរកឃើញរបស់យើង»។

គួរបញ្ជាក់ថា មនុស្សជាង ៣.៦០០​នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែល លើលីបង់ ហើយ​ប្រជាជនលីបង់ជាង ១លាននាក់ ត្រូវបានផ្លាស់ទីលំនៅ។ សហរដ្ឋអាមេរិកបានប្រកាសបទឈប់បាញ់នៅថ្ងៃទី១៦ ខែមេសា ប៉ុន្តែការប្រយុទ្ធគ្នានៅតែបន្តមាន​ ហើយប្រទេសលីបង់ បញ្ជាក់​ថា អ៊ីស្រាអែលបានធ្វើការវាយប្រហារជិត ៣.៥០០ដង ចាប់តាំងពីបទឈប់បាញ់ត្រូវបានប្រកាស៕