ក្នុងអំឡុងពេលផ្ដល់​បទ​សម្ភាសន៍ថ្មីៗនេះជាមួយសារព័ត៌មាន The Economist ដែលបានចេញផ្សាយនៅ​ថ្ងៃពុធ (ទី​១០ ខែមិថុនា ឆ្នាំ២០២៦) នេះ ប្រធានាធិបតីកូរ៉េខាងត្បូង លោក Lee Jae Myung បាននិយាយថា ប្រទេស​កូរ៉េខាងជើងហាក់​ជាកាន់តែលែង​បោះបង់កម្មវិធីនុយក្លេអ៊ែររបស់ខ្លួន ក្នុងអំឡុងពេលមាន​សង្គ្រាម រវាង​សហរដ្ឋ​អាមេរិក និង​អ៊ីរ៉ង់។

លោក Lee បាននិយាយថា៖ «បន្ទាប់ពីមាន​ (ការចាប់ផ្តើម) ​សង្គ្រាមនៅអ៊ីរ៉ង់ កូរ៉េខាងជើង នឹងកាន់តែលែង​មាន​ឆន្ទៈបោះបង់ឃ្លាំងអាវុធរបស់ខ្លួន»។ លោក Lee បានបន្ថែមថា «បុគ្គលិកលក្ខណៈពិសេស» របស់ប្រធានាធិបតីអាមេរិក លោក Donald Trump អាច «មានអត្ថ​ប្រយោជន៍ខ្លាំងណាស់» នៅក្នុងស្ថានភាពបច្ចុប្បន្នជាមួយកូរ៉េខាងជើង។

គួរបញ្ជាក់​ថា ទីក្រុងព្យុងយ៉ាងបានបញ្ជាក់​ថា កម្មវិធីនុយក្លេអ៊ែររបស់ខ្លួន គឺ «មិនអាចចរចាបាន» ខណៈពេលដែលសង្កត់ធ្ងន់ថា ឋានៈ​នុយក្លេអ៊ែររបស់កូរ៉េខាងជើង គឺ «មិនអាចកែប្រែ​បានឡើយ​»។

សង្គ្រាមអាមេរិក-អ៊ីរ៉ង់ បានចាប់ផ្តើមកាល​ពី​ថ្ងៃទី២៨​ ខែកុម្ភៈ នៅពេលដែលសហរដ្ឋអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់។ ទីក្រុងតេអេរ៉ង់បានសងសឹកដោយការវាយប្រហារដែលផ្តោតលើអ៊ីស្រាអែល និងសម្ព័ន្ធមិត្តអាមេរិក នៅតំបន់​ឈូងសមុទ្រពែក្ស ហើយបានបិទច្រកសមុទ្រ Hormuz។ បទឈប់បាញ់មួយ​បានចូលជាធរមានកាល​ថ្ងៃទី៨ ខែមេសា តាមរយៈការសម្របសម្រួលរបស់ប៉ាគីស្ថាន៕