ប្រណាំងយានយន្ត៖ លោក ហូ សិទ្ធីគុណ អនុប្រធានសហព័ន្ធកីឡាយានយន្តកម្ពុជា និងជាភ្នាក់ងាររៀបចំការប្រណាំងយានយន្ត KARA បានបង្ហាញសុទិដ្ឋិនិយមខ្ពស់ ចំពោះការរៀបចំព្រឹត្តិការណ៍ប្រណាំងយានយន្តឆ្លងកាត់ឧបសគ្គ Khmer Rally Raid Practice 2022 ដោយក្រុមការងារបច្ចេកទេសខ្មែរសុទ្ធសាធនាថ្ងៃទី១៤-១៥ ខែឧសភាខាងមុខនឹងទទួលបានជោគជ័យ និងពុំមានកង្វល់អ្វីឡើយ។
លោកបានលើកឡើងបែបនេះនៅក្នុងកម្មវិធីជួបជុំ និងធ្វើបទបង្ហាញដល់អ្នកចូលរួម ពិសេសកីឡាករ-កីឡាការិនីក្មេងខ្ចីដើម្បីបានយល់ច្បាស់អំពីលក្ខខណ្ឌបច្ចេកទេស និងលក្ខន្តិកៈនៃការប្រកួតមុនឈានដល់ការប្រកួតផ្លូវការ ដ្បិតព្រឹត្តិការណ៍នេះផ្ដោតសំខាន់លើការអភិវឌ្ឍន៍វិស័យកីឡាយានយន្តកម្ពុជា ពិសេសអ្នកទើបហ្វឹកហាត់កីឡាមួយនេះ ក៏ដូចជារួមចំណែកផ្សព្វផ្សាយពីតំបន់ធម្មជាតិ សហគមន៍ និងតំបន់ទេសចរណ៍ផ្សេងៗនៅកម្ពុជាទៀតផង។
សូមបញ្ជាក់ថា ព្រឹត្តិការណ៍ប្រណាំងយានយន្ដឆ្លងកាត់ឧបសគ្គ Khmer Rally Raid Practice 2022 គ្រោងចេញដំណើរពីរាជធានីភ្នំពេញទៅខេត្តកំពត ហើយចេញពីខេត្តកំពតមកបញ្ចប់នៅរាជធានីភ្នំពេញវិញ ក្រោមការគាំទ្ររបស់ក្រសួងបរិស្ថាន សហភាពសហព័ន្ធយុវជនកម្ពុជា និងសហព័ន្ធកីឡាយានយន្ដកម្ពុជា។ តាមគម្រោងការប្រកួតនេះកំណត់ម៉ូតូ ២០គ្រឿង និងរថយន្ដ ២០គ្រឿងចូលរួម តែដោយសារមានការចុះឈ្មោះចូលរួមលើសការរំពឹងទុក គណៈកម្មការរៀបចំកំពុងពិភាក្សា និងបំបែកជាវិញ្ញាសាផ្សេងៗដើម្បីផ្ដល់ឱកាសឲ្យកីឡាករ-កីឡាការិនីទាំងអស់បានចូលរួម ពិសេសកីឡាករ-កីឡាការិនីក្មេងខ្ចីតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
