ចំនួនមនុស្សដែលត្រូវបានផ្លាស់ទីលំនៅទូទាំងពិភពលោកដោយសារជម្លោះ និងបញ្ហាផ្សេងៗបានធ្លាក់ចុះនៅឆ្នាំ ២០២៥ ជាលើកដំបូងក្នុងរយៈពេលមួយទសវត្សរ៍ ប៉ុន្តែកម្រិតនៃជនភៀសខ្លួនដែលប្រឈមនឹងការផ្លាស់ទីលំនៅរយៈពេលវែង នៅតែខ្ពស់មិនអាចទទួលយកបាន។ នេះបើយោងតាមរបាយការណ៍របស់ទីភ្នាក់ងារជនភៀសខ្លួនអង្គការសហប្រជាជាតិ(UNHCR) ដែលបានចេញផ្សាយកាលពីថ្ងៃព្រហស្បតិ៍។

UNHCR បាននិយាយថា កាលពីឆ្នាំមុន មនុស្ស ៥,៤ លាននាក់ បានភៀសខ្លួនចេញពីផ្ទះសម្បែងរបស់ពួកគេ ដែលធ្វើឲ្យចំនួនសរុបនៃជនភៀសខ្លួន ឬមនុស្សដែលស្ថិតក្នុងស្ថានភាពដូចជនភៀសខ្លួន នៅទូទាំងពិភពលោក កើនដល់ ៤១,៦ លាននាក់ ក្នុងនោះមានជនភៀសខ្លួនប៉ាឡេស្ទីនចំនួន ៦ លាននាក់។

ក្នុងពេលជាមួយគ្នានេះ ជនភៀសខ្លួន និងអ្នកផ្លាស់ទីលំនៅប្រហែល ១៤,៧ លាននាក់ បានវិលត្រឡប់មកផ្ទះសម្បែងវិញ គឺកើនឡើង ៥០ ភាគរយ បើធៀបនឹងឆ្នាំមុន និងជាតួលេខខ្ពស់បំផុតទី២ ដែលបានកត់ត្រា ចាប់តាំងពីឆ្នាំ ១៩៦៥។ នេះបើយោងតាមទីភ្នាក់ងារនេះ។

អ្នកវិលត្រឡប់ភាគច្រើន គឺទៅកាន់ប្រទេសចំនួន ៦៖ សាធារណរដ្ឋប្រជាធិបតេយ្យកុងហ្គោ ស៊ូដង់ ស៊ីរី អាហ្វហ្គានីស្ថាន អ៊ុយក្រែន និងមីយ៉ាន់ម៉ា៕