ប្រធានាធិបតីអ៊ីរ៉ង់ លោក Masoud Pezeshkian បាននិយាយកាលពីថ្ងៃពុធថា ការគំរាមកំហែងរបស់សហរដ្ឋអាមេរិកក្នុងការកំណត់គោលដៅហេដ្ឋារចនាសម្ព័ន្ធសំខាន់ៗរបស់អ៊ីរ៉ង់ គឺជាសញ្ញានៃភាពអស់សង្ឃឹមរបស់ខ្លួន ក្នុងប្រឆាំងនឹងឆន្ទៈរបស់ប្រទេសនេះ។

លោកបានធ្វើការអត្ថាធិប្បាយនេះ នៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម X ដោយឆ្លើយតបទៅនឹងការគំរាមកំហែងដែលបានថ្លែងឡើងថ្មីៗនេះ ដោយប្រធានាធិបតីអាមេរិក លោក ដូណាល់ ត្រាំ ដែលបាននិយាយថា លោកអាចនឹងបញ្ជាឲ្យមានការវាយប្រហារថ្មីលើរោងចក្រថាមពល និងស្ពានរបស់អ៊ីរ៉ង់ ជុំវិញការពន្យារពេលរបស់ទីក្រុងតេអេរ៉ង់ ក្នុងការចុះហត្ថលេខាលើកិច្ចព្រមព្រៀងជាមួយទីក្រុងវ៉ាស៊ីនតោន។

លោក Pezeshkian បាននិយាយថា៖«ហេដ្ឋារចនាសម្ព័ន្ធសំខាន់ៗ គឺជាសរសៃឈាមជីវិតរបស់ប្រជាជន។ ការគំរាមកំហែងកំណត់គោលដៅពួកវា ចាប់ពីបណ្តាញដឹកជញ្ជូន រហូតដល់ឧស្សាហកម្មអគ្គិសនី និងទឹក មិនមែនជាការបង្ហាញអំណាចទេ ប៉ុន្តែជាសញ្ញានៃភាពអស់សង្ឃឹមក្នុងការទប់ទល់នឹងឆន្ទៈរបស់ប្រទេសមួយនេះ។

លោកបានសម្តែងទំនុកចិត្តថា ដោយពឹងផ្អែកលើចំណេះដឹង និងសមត្ថភាពរបស់អ្នកជំនាញ ក៏ដូចជាឯកភាពជាតិ និងសាមគ្គីភាព អ៊ីរ៉ង់នឹងឈរយ៉ាងរឹងមាំប្រឆាំងនឹងសម្ពាធ និងការគំរាមកំហែងណាមួយ។

នៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម Truth Social កាលពីថ្ងៃពុធ លោក ត្រាំ បាននិយាយថា អ៊ីរ៉ង់ «បានចំណាយពេលយូរពេក ដើម្បីចរចាកិច្ចព្រមព្រៀង» ហើយបច្ចុប្បន្ននឹងត្រូវជួប ផលវិបាកធ្ងន់ធ្ងរ៕