សហរដ្ឋអាមេរិក និងអ៊ីរ៉ង់ បានវាយប្រហារគ្នាទៅវិញទៅមកពី​លើ​អាកាស​ នៅថ្ងៃព្រហស្បតិ៍ (ទី១១ ខែមិថុនា ឆ្នាំ២០២៦) នេះ ដែល​ជា​ការ​ប្រយុទ្ធ​គ្នា​ថ្ងៃទី២ ជាប់គ្នា ខណៈដែល​ប្រធានាធិបតី លោក Donald Trump បញ្ជាក់​ច្បាស់ៗថា ​ការ​វាយប្រហារបន្ថែមទៀតនឹង​កើត​មាន​ ប្រសិនបើទីក្រុងតេអេរ៉ង់មិនយល់ព្រមភ្លាមៗ ចំពោះកិច្ចព្រមព្រៀងសន្តិភាពទេ​នោះ​។

ការកើនឡើងនៃ​អរិភាពនេះ​បានចាប់ផ្តើមនៅដើមសប្តាហ៍នេះ ដោយសារ​ការបាញ់ទម្លាក់ឧទ្ធម្ភាគចក្រ Apache ១គ្រឿង​របស់សហរដ្ឋអាមេរិក នៅជិតច្រកសមុទ្រ Hormuz ដែលបានបង្កឲ្យ​មានការវាយប្រហារសង​សឹក​គ្នា​ជាបន្តបន្ទាប់ នៅទូទាំងប្រទេសអ៊ីរ៉ង់ និងលើមូលដ្ឋានរបស់សហរដ្ឋអាមេរិក នៅជុំវិញតំបន់នេះ​។

នេះ​គឺជាការគំរាមកំហែងធ្ងន់ធ្ងរបំផុត ចំពោះបទឈប់បាញ់ដ៏ផុយស្រួយដែលបានព្រមព្រៀងគ្នា នៅក្នុងខែមេសា ដោយ​បំផ្លាញ​ក្តីសង្ឃឹម ដែល​ថា ​នឹង​មាន​ការបញ្ចប់យ៉ាងឆាប់រហ័ស​ សម្រាប់​សង្គ្រាម​ដែលបានចាប់ផ្តើមនៅចុងខែកុម្ភៈ ជាមួយនឹងការវាយប្រហារតាមអាកាសរួមគ្នាដ៏ធំ រវាងសហរដ្ឋអាមេរិក និងអ៊ីស្រាអែល លើអ៊ីរ៉ង់។

យោធាសហរដ្ឋអាមេរិក បានឲ្យដឹង​ថា ការវាយប្រហារចុងក្រោយរបស់ខ្លួន បានកំណត់គោលដៅលើ «សមត្ថភាពឃ្លាំមើលយោធា ប្រព័ន្ធទំនាក់ទំនង និងទីតាំងការពារដែនអាកាស នៅទូទាំងប្រទេសអ៊ីរ៉ង់» ដើម្បីឆ្លើយតបទៅនឹងអ្វីដែលខ្លួនចាត់ទុក​ថា ជា «ការបន្ត​ឈ្លានពានមិនសមហេតុផល» របស់ទីក្រុងតេអេរ៉ង់។ ចំណែក​កងឆ្មាំបដិវត្តន៍ឥស្លាមអ៊ីរ៉ង់ (IRGC) បានប្រាប់​ថា ខ្លួនបានបើកការវាយប្រហារតបតទៅលើគោលដៅយោធាអាមេរិកចំនួន ១៨ នៅឯ​មូលដ្ឋានទ័ពអាកាស ក្នុងប្រទេសគូវ៉ែត និងបារ៉ែន ព្រម​ទាំង​កងនាវាទី៥ របស់កងទ័ពជើងទឹកអាមេរិក នៅបារ៉ែន។

គួរ​បញ្ជាក់​ថា សហរដ្ឋអាមេរិក និងអ៊ីរ៉ង់ បានវាយ​ប្រហារ​គ្នាជា​ច្រើនដង ចាប់តាំងពីបទឈប់បាញ់បណ្តោះអាសន្នបានចូលជាធរមាន ទោះបីជាក្រុម​អ្នក​ចរចា​ពី​ភាគី​ទាំង២ បានព្យាយាម តែ​មិនជោគជ័យ ក្នុង​ការ​បញ្ចប់សង្គ្រាមនេះ​ក៏ដោយ ដែលឥឡូវនេះស្ថិតនៅក្នុងខែទី៤ ហើយ​៕