ប្រទេស​អ៊ីរ៉ង់បានព្រមាននៅព្រឹកថ្ងៃព្រហស្បតិ៍ (ទី១១ ខែមិថុនា ឆ្នាំ២០២៦) នេះថា តំបន់នេះនឹងក្លាយជា «ឋាននរក» សម្រាប់សហរដ្ឋអាមេរិក ដោយសារ​ភាពតានតឹង នៅ​ជុំវិញ​ច្រកសមុទ្រ Hormuz។

នៅក្នុងសុន្ទរកថាដែលផ្សព្វផ្សាយដោយទីភ្នាក់ងារសារព័ត៌មាន Mehr លោក Seyed Majid Mousavi មេបញ្ជាការកងកម្លាំងអាកាសនៃកងឆ្មាំបដិវត្តន៍ឥ​ស្លាម (IRGC) បានព្រមានថា កុំ​ប៉ុនប៉ងធ្វើ​ការ​គំរាមកំហែង នៅ​ «ច្រកសមុទ្រដ៏ពិសិដ្ឋ គឺ Hormuz»។

លោកបានបញ្ជាក់​បន្ថែម​ថា៖ «ប្រសិនបើអ្នកធ្វើឲ្យ​ច្រកសមុទ្រ Hormuz អសន្តិសុខ យើងនឹងប្រែក្លាយតំបន់នេះឲ្យ​ទៅជាឋាននរក សម្រាប់អ្នក ដោយ​ការ​វាយ​ប្រហារ​ចេញពី​ទូទាំងប្រទេស​អ៊ីរ៉ង់»។ លោក Mousavi បានពិពណ៌នាអំពីការព្រមាននេះថា ជាការឆ្លើយតបទៅនឹង «ភាពគឃ្លើន​របស់សហរដ្ឋអាមេរិក» នៅក្នុងតំបន់នេះ​។

នៅ​មុននេះ IRGC បានឲ្យ​ដឹង​ថា គោលដៅយោធាសំខាន់ៗចំនួន ១៨​ របស់សហរដ្ឋអាមេរិក ត្រូវបានវាយប្រហារ នៅឯ​មូលដ្ឋាន Ali Al Salem និង Ahmad Al Jaber ក្នុងប្រទេសគូវ៉ែត រួមជាមួយនឹងមូលដ្ឋាន Sheikh Isa នៅ​បារ៉ែន។

គួរ​បញ្ជាក់​ថា សភាព​ការណ៍វិវត្តន៍នេះ បានកើតឡើងស្រប​ពេលមានការ​កើនឡើងនូវ​ភាព​តាន​តឹង​យ៉ាងឆាប់រហ័ស បន្ទាប់ពីមាន​ការវាយប្រហាររបស់សហរដ្ឋអាមេរិក នៅ​ភាគខាងត្បូងអ៊ីរ៉ង់ និងការប្រកាសបន្ទាប់​មក​របស់ទីក្រុងតេអេរ៉ង់ ក្នុង​ការ​បិទច្រកសមុទ្រ Hormuz មិន​ឲ្យ​នាវាទាំងអស់ធ្វើដំណើរឆ្លងកាត់​៕