ឆ្មាំ​សមុទ្រ​របស់កោះតៃវ៉ាន់ បាន​ឲ្យ​ដឹង​ថា ​អធិបតេយ្យភាពដែនសមុទ្ររបស់ដែន​កោះ​នេះ​ មិនអាចត្រូវបាន​ «រំលោភបំពាន»​ ដោយកិច្ចប្រឹងប្រែងរបស់ប្រទេសចិន ក្នុង​គោលបំណងបញ្ជាក់​អំពីយុត្តាធិការនោះទេ​ បន្ទាប់ពីទីក្រុង​ប៉េកាំង​បានបញ្ចប់ការល្បាត នៅម្ដុំ​ឆ្នេរសមុទ្រភាគខាងកើតរបស់ខ្លួន។

ប្រទេសចិន ដែលអះអាងថា តៃវ៉ាន់ ជា​កោះ​ស្វ័យ​​គ្រប់គ្រងតាមបែបប្រជាធិបតេយ្យមួយ​នេះ ជាទឹកដីរបស់ខ្លួននោះ​ មានការខឹងសម្បា ក្រោយ​ជប៉ុន និងហ្វីលីពីន បានឲ្យ​ដឹងក្នុង​ខែឧសភាថា ប្រទេស​ទាំង២ នឹងចាប់ផ្តើមការចរចាជាផ្លូវការ ស្ដី​ពី​ការ​កំណត់​ព្រំដែនដែនសមុទ្រ ដោយមើលឃើញថា វាពាក់ព័ន្ធនឹងដែនទឹកនៅម្ដុំ​កោះ​តៃវ៉ាន់។

កាល​ពី​យប់​ថ្ងៃទី៦ ខែមិថុនា ប្រព័ន្ធផ្សព្វផ្សាយរដ្ឋចិនបានរាយការណ៍ថា នាវាត្រូវបានបញ្ជូនទៅអនុវត្ត «ប្រតិបត្តិការអនុវត្តច្បាប់ចរាចរណ៍ផ្លូវសមុទ្រពិសេស» និងត្រួតពិនិត្យការដឹកជញ្ជូន នៅក្នុងដែនទឹកភាគខាងកើតនៃ​កោះ​តៃវ៉ាន់ ដើម្បីឆ្លើយតបទៅនឹងការប្រកាសរបស់ជប៉ុន និងហ្វីលីពីន។

នៅយប់​ថ្ងៃទី១០​ ខែមិថុនា ប្រព័ន្ធផ្សព្វផ្សាយរដ្ឋចិន បានឲ្យ​ដឹង​ថា ការល្បាតបានបញ្ចប់ហើយ​ បន្ទាប់ពីបាន «ត្រួតពិនិត្យនាវាឆ្លងកាត់ចំនួន ១៩៨​គ្រឿង និងកែតម្រូវការរំលោភបំពាន ដែលពាក់ព័ន្ធនឹងនាវាចំនួន ៣គ្រឿង» ដោយ​បាន​ធ្វើការ​សិក្សា​អ៊ីដ្រូក្រាហ្វី និងល្បាតតំបន់ដែលមានខ្សែកាបក្រោមសមុទ្រ។

យ៉ាង​ណាក្ដី ឆ្មាំល្បាត​ឆ្នេររបស់​កោះ​តៃវ៉ាន់បានបញ្ជាក់​ថា ទីក្រុងប៉េកាំងមិនមានយុត្តាធិការ នៅក្នុងដែនទឹកទាំងនោះទេ ហើយនៅពេលដែលនាវាចិនបង្ហាញខ្លួន នាវារបស់កោះ​តៃវ៉ាន់នឹង «បណ្តេញឲ្យ​ចាក​ចេញដោយបង្ខំ ហើយរក្សាសេរីភាព និងសុវត្ថិភាពនៃការធ្វើនាវាចរណ៍»។ ឆ្មាំ​បានសង្កត់ធ្ងន់​នៅក្នុងសេចក្តីថ្លែងការណ៍មួយថា៖ «អធិបតេយ្យភាពដែនសមុទ្ររបស់ដែន​កោះ​យើង មិនអាចត្រូវបានរំលោភបំពានឡើយ​​។ ប្រទេសណាមួយដែលអះអាងយុត្តាធិការ នឹងត្រូវបណ្តេញចេញដោយគ្មានករណីលើកលែង»៕