រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth បាននិយាយថា កងកម្លាំងសហរដ្ឋអាមេរិក នឹងអនុវត្តតាមបញ្ជារបស់លោក​ប្រធានាធិបតី Donald Trump ហើយវាយប្រហារអ៊ីរ៉ង់យ៉ាងខ្លាំងនៅថ្ងៃទី១០ ខែមិថុនា ឆ្នាំ​២០២៦ (តាម​ពេល​វេលារបស់​សហរដ្ឋ​អាមេរិក) ដោយការទម្លាក់គ្រាប់បែកលើ «ទីតាំងសំខាន់ៗ»។

អំឡុង​និយាយ​ទៅកាន់អ្នកសារព័ត៌មាន បន្ទាប់ពីត្រូវបានរាយ​ការណ៍​ដោយមេបញ្ជាការ នៅឯ​ទីស្នាក់ការកណ្តាលនៃ​បញ្ជាការកណ្តាលរបស់​សហរដ្ឋអាមេរិក ក្នុង​រដ្ឋ Florida លោក Hegseth បាននិយាយថា អ៊ីរ៉ង់ត្រូវបានផ្តល់ឱកាសឲ្យ​ធ្វើកិច្ចព្រមព្រៀង ប៉ុន្តែមិនទទួលយកវាឡើយ​។

លោក Hegseth បាននិយាយថា៖ «យើងនឹងវាយប្រហារពួកគេយ៉ាងខ្លាំង តាម​លក្ខខណ្ឌរបស់យើង លើគោលដៅដែលធ្វើឲ្យ​បរិយាកាសប្រសើរឡើង ដើម្បី​អាច​ឲ្យ​យើងធ្វើប្រតិបត្តិការ និងធ្វើឲ្យ​ខូចសមត្ថភាពដែល​អ៊ីរ៉ង់ចង់​មាន​»។

លោក Hegseth បាននិយាយបែប​នេះ​បន្ទាប់ពីលោក Trump បាននិយាយថា សហរដ្ឋអាមេរិក នឹងវាយប្រហារអ៊ីរ៉ង់ម្តងទៀត ប្រសិនបើមិនមាន​កិច្ចព្រមព្រៀងសន្តិភាពណាមួយ​ទេនោះ ដោយគំរាមកំហែងឲ្យ​មានភាព​តាន​តឹង​កើនឡើងបន្ថែមទៀត ក្រោយ​ផ្ទុះ​អរិភាព​យ៉ាង​ធំ​ជាថ្មីជាលើក​ដំបូង​​ ក្នុងរយៈពេល ២ខែ។

លោក Hegseth បានចោទប្រកាន់អ៊ីរ៉ង់ថា «ជ្រើសរើសលេងហ្គេម» ពោល​គឺ​មិនបាន​ធ្វើការ​ចរចា​ដោយ​ប្រាកដប្រជា​ ហើយបានបន្ថែមថា ប្រសិនបើការ​ចរចាបរាជ័យ សហរដ្ឋ​អាមេរិក​នឹងមានតែ​ធ្វើ​​ប្រតិបត្តិការ​ខាង​យោធាប៉ុណ្ណោះ​៕