នៅថ្ងៃព្រហស្បតិ៍ (ទី១១ ខែមិថុនា ឆ្នាំ​២០២៦) នេះ ប្រទេសចំនួន ២២ ក្នុង​នោះ​រួមមាន​ទាំងសហរដ្ឋអាមេរិក និងបណ្តាប្រទេសនៅអឺរ៉ុបផង​ដែរ​ បានរួមគ្នាព្រមានអ៊ីរ៉ង់ថា ត្រូវ​បញ្ឈប់ការវាយប្រហារមនុស្ស នៅលើដែន​ដីរបស់ពួកគេ​។

សេវា​សន្តិសុខរបស់អ៊ីរ៉ង់ ត្រូវបានថ្កោលទោស ចំពោះការប្រើប្រាស់ «ដ៏គួរឲ្យ​ស្អប់ខ្ពើម» របស់ពួកគេ ចំពោះក្រុមអន្ធ​ពាល​អន្តរជាតិ និងក្នុងស្រុក ដើម្បី​អនុវត្ត​ផែនការ នៅតំបន់​អឺរ៉ុប អាមេរិកខាងជើង និងអូស្ត្រាលី។

ប្រទេសទាំងនោះ បានលើក​ឡើង​នៅក្នុងសេចក្តីថ្លែងការណ៍រួមមួយថា៖ «ការប៉ុនប៉ងសម្លាប់ ចាប់ជំរិត យាយី បំភិតបំភ័យ ឬវាយប្រហារមនុស្សនៅលើដែន​ដីរបស់យើង ធ្វើឲ្យ​ប៉ះពាល់ដល់អធិបតេយ្យភាពជាតិ និងបទដ្ឋានអន្តរជាតិ។ សកម្មភាពទាំងនេះត្រូវតែបញ្ឈប់ជាបន្ទាន់»។

ប្រទេស​ទាំង​នោះ​បានបន្ត​​ថា សេវាស៊ើបការណ៍សម្ងាត់របស់កងឆ្មាំបដិវត្តន៍ឥស្លាមអ៊ីរ៉ង់ (IRGC) និងសាខា​ប្រតិបត្តិការបរទេសរបស់ខ្លួន គឺកងកម្លាំង Quds Force បានចូលរួមក្នុង «ផែនការសម្លាប់ និងសកម្មភាពបង្កគ្រោះថ្នាក់» ប្រឆាំង​នឹង​​អ្នកប្រឆាំងអ៊ីរ៉ង់ អ្នកសារព័ត៌មាន និងសហគមន៍ ព្រម​ទាំង​ផលប្រយោជន៍ជនជាតិជ្វីហ្វ និងអ៊ីស្រាអែល។

ប្រទេសទាំង​នោះ​បានសង្កត់ធ្ងន់​ថា៖ «យើងរួបរួមគ្នាប្តេជ្ញាចិត្តការពារប្រទេស និងប្រជាជនរបស់យើង ពីការគំរាមកំហែងទាំងនេះ។ សាធារណរដ្ឋឥស្លាមអ៊ីរ៉ង់ ត្រូវតែបញ្ឈប់សកម្មភាពទាំងនេះឥឡូវនេះ»។

ប្រទេសទាំងនោះបានចោទប្រកាន់អ៊ីរ៉ង់ថា ជាអ្នកនៅពីក្រោយយុទ្ធនាការវាយប្រហារ នៅទូទាំងទ្វីបអឺរ៉ុប ដែលផ្តោតលើសហគមន៍ជ្វីហ្វ អ្នកសារព័ត៌មាន​អ៊ីរ៉ង់ និងអ្នកសារព័ត៌មានអាមេរិក ដែលត្រូវបានអះអាងដោយក្រុម Harakat Ashab al-Yamin al-Islamiya (HAYI) ដែលមានទំនាក់ទំនងជាមួយអ៊ីរ៉ង់៕