ស្ថាប័ន​គ្រប់គ្រង​ឯកជនភាព​របស់កូរ៉េខាងត្បូង នៅ​ថ្ងៃព្រហស្បតិ៍ (ទី១១ ខែមិថុនា ឆ្នាំ​២០២៦) នេះ​ បាន​ឲ្យ​ដឹង​ថា ប្រទេសនេះនឹងពិន័យក្រុមហ៊ុនពាណិជ្ជកម្មតាម​ប្រព័ន្ធ​អេឡិចត្រូនិកលំដាប់​យក្ស Coupang នូវ​ទឹក​ប្រាក់​ចំនួន ៦២៥ពាន់លានវ៉ុន (៤០៩,៣០លានដុល្លារ) ពាក់​ព័ន្ធ​នឹង​ការ​បែក​ធ្លាយព័ត៌មានអតិថិជនយ៉ាងច្រើន កាលពីឆ្នាំមុន និងការប្រមូលព័ត៌មានផ្ទាល់ខ្លួនដោយ​ខុសច្បាប់ ដោយ​នេះ​គឺ​ជាការពិន័យ ចំពោះការរំលោភទិន្នន័យដ៏ធំបំផុតរបស់ប្រទេស លើ​ក្រុមហ៊ុនមួយ។

គណៈកម្មការការពារព័ត៌មានផ្ទាល់ខ្លួន (Personal Information Protection Commission) បានបញ្ជាក់​​ថា ក្រុមហ៊ុនដែលបានចុះបញ្ជីនៅទីក្រុង New York សហរដ្ឋ​អាមេរិក​មួយនេះ បានបង្ហាញ​ទិន្នន័យផ្ទាល់ខ្លួនរបស់អតិថិជនជាង ៣៣លាននាក់ ហើយមិនអាច​រកឃើញការរំលោភបំពាន ក្នុងរង្វង់​រយៈពេល ៧២ម៉ោង តាមការ​តម្រូវ​របស់​ច្បាប់។

ប្រធានស្ថាប័ន​គ្រប់គ្រង​ឯកជនភាព​ លោកស្រី Song Kyung-hee បានប្រាប់សន្និសីទសារព័ត៌មានមួយនៅ​ថ្ងៃព្រហស្បតិ៍នេះ​ថា៖ «ហេតុការណ៍​នេះបានកើតឡើងដោយសារតែការ​ខ្វះខាត​នូវ​វិធានការ និងប្រព័ន្ធសុវត្ថិភាព​របស់ក្រុម​ហ៊ុន​ Coupang មិនមែនជាការលួចចូលដ៏ស្មុគស្មាញនោះឡើយ​»។

យោងតាមការគណនារបស់សារព័ត៌មាន​ Reuters បាន​ឲ្យ​ដឹង​ថា ការពិន័យនេះមានចំនួន ១,៤ភាគរយ​នៃប្រាក់ចំណូលរបស់ក្រុម​ហ៊ុន​ Coupang ដែល​មាន​ចំនួន ៤៥សែនកោដិ​វ៉ុន ក្នុងឆ្នាំ២០២៥។ បន្ទាប់ពីការពិន័យត្រូវបានប្រកាស ក្រុម​ហ៊ុន Coupang បានសូម​អភ័យ​ទោស ចំពោះការបង្កឲ្យ​មាន​ការព្រួយបារម្ភដល់សាធារណជន និងអតិថិជនរបស់ខ្លួន៕