អ្នក​នយោបាយ​អភិរក្សនិយម លោកស្រី Keiko Fujimori បានឡើងមកនាំមុខបន្តិចវិញ នៅក្នុងការប្រកួតប្រជែងដណ្ដើម​តំណែង​ប្រធានាធិបតីដ៏ស្វិតស្វាញរបស់ប្រទេសប៉េរូ កាល​ពី​យប់ថ្ងៃពុធ (ទី១០ ខែមិថុនា ឆ្នាំ២០២៦) ខណៈដែលសន្លឹកឆ្នោតនៅក្រៅប្រទេសដែលនៅសល់ បានរុញឲ្យ​គូប្រជែងឆ្វេងនិយមរបស់លោកស្រី គឺលោក Roberto Sanchez ឲ្យ​ទៅ​នៅ​ពីក្រោយ​។

ឥឡូវនេះ លោកស្រី Fujimori មានសំឡេងនាំ​មុខ​តិចតួចបំផុត ដោយទទួល​បានសំឡេង​ឆ្នោត​ ៥០,០០២ភាគរយ ទល់នឹង ៤៩,៩៩៨ភាគរយ​របស់លោក Sanchez ពោល​គឺ​នាំមុខប្រហែល ៦៥០​សំឡេង ដោយការិយាល័យបោះឆ្នោតចំនួន ៩៨,២១ភាគរយ ឬប្រហែល ១៨លានសំឡេង បាន​រាយ​ការណ៍​ពី​លទ្ធផល​។ នេះបើយោងតាមអាជ្ញាធររៀប​ចំ​ការ​បោះឆ្នោត ONPE របស់ប្រទេសប៉េរូ។

នៅសល់តែសន្លឹកឆ្នោតមួយចំនួនតូចប៉ុណ្ណោះដែលត្រូវរាប់ ប៉ុន្តែការិយាល័យបោះឆ្នោតចំនួន ១,៧៦ភាគរយ​ ដែលតំណាងឲ្យ​សំឡេងឆ្នោតប្រហែល ៤០០.០០០សន្លឹក​ ត្រូវបានបញ្ជូនសម្រាប់ការពិនិត្យតាមផ្លូវតុលាការ ជា​ដំណើរការដែលអាចចំណាយពេលច្រើនសប្តាហ៍។ សន្លឹកឆ្នោតដែលមានភាព​ចម្រូង​ចម្រាសភាគច្រើន គឺមកពីតំបន់ទីប្រជុំជន Lima ដែលជាកន្លែង​មាន​គាំទ្រដ៏រឹង​មាំ​ ចំពោះ​លោកស្រី Fujimori។

បេក្ខជនទាំង ២នាក់ ទទួល​បាន​សំឡេង​​កៀក​កិត​គ្នា​​ ក្នុង​អំឡុង​រយៈពេល​នៃ​​ការរាប់សន្លឹកឆ្នោតនេះ​ ដោយលោកស្រី​ Fujimori នាំមុខក្នុង​​ការ​ស្ទង់មតិតាម​មណ្ឌល​បោះឆ្នោត​ ហើយលោក Sanchez នាំមុខបន្តិចនៅក្នុងការរាប់សន្លឹកឆ្នោតរហ័សរបស់ស្ថាប័ន​ Ipsos ដែលបានព្យាករយ៉ាងត្រឹមត្រូវ អំពីការ​ប្រកួត​ប្រជែង​មុន​ៗ​។ ទាំង​លោកស្រី​ Fujimori និងលោក Sanchez បានអំពាវនាវឲ្យ​មានភាពស្ងប់ស្ងាត់ និងការអត់ធ្មត់ក្នុង​អំឡុង​ដំណើរ​ការរាប់សន្លឹកឆ្នោតនេះ​៕