នៅថ្ងៃព្រហស្បតិ៍ (ទី១១ ខែមិថុនា ឆ្នាំ២០២៦) នេះ ប្រទេសចិនបានអំពាវនាវជា​ថ្មី​ឲ្យ​សហរដ្ឋអាមេរិក និងអ៊ីរ៉ង់បញ្ឈប់ការប្រយុទ្ធគ្នា ហើយ​វិលត្រឡប់ទៅរកការសន្ទនាវិញ។

អ្នកនាំពាក្យក្រសួងការបរទេស លោក Lin Jian បានប្រាប់អ្នកសារ​ព័ត៌មានថា ទីក្រុងប៉េកាំងមានក្ដី​បារម្ភយ៉ាងខ្លាំង អំពីស្ថានភាពនេះ។ លោកបាននិយាយថា ជម្លោះយោធានឹងត្រឹម​តែ​ធ្វើឲ្យ​ស្ថានការណ៍កាន់តែធ្ងន់ធ្ងរឡើង​ៗប៉ុណ្ណោះ​ ហើយការចាប់​ផ្ដើម​វិធានការ​យោធាឡើង​វិញ នឹងមិនដោះស្រាយបញ្ហាជាមូលដ្ឋានណាមួយឡើយ​។

អម​ដោយការ​ជំរុញឲ្យ​ភាគីពាក់ព័ន្ធបញ្ឈប់វិធានការ​យោធា ចាប់​ផ្ដើម​ការសន្ទនា និងការចរចាឡើង​វិញ​ ឆ្លើយតបទៅនឹងកិច្ចប្រឹងប្រែងសម្របសម្រួលរបស់ប្រទេសពាក់ព័ន្ធ និងសម្រេចបាននូវបទឈប់បាញ់គ្នាឲ្យ​បានឆាប់តាមដែលអាចធ្វើបាន លោក Lin បានបញ្ជាក់​ថា៖ «អធិបតេយ្យភាព សន្តិសុខ និងបូរណភាពទឹកដីរបស់ប្រទេសក្នុងតំបន់ គួរតែត្រូវបានគោរព និងការពារ»។

ជាមួយ​គ្នានេះ លោក Lin បានបន្ថែម​ថា ប្រទេសចិនបានបន្ត​រក្សាទំនាក់ទំនងជាមួយភាគីពាក់ព័ន្ធ ក្នុង​នោះ​រួមទាំងអ៊ីរ៉ង់ផង​ដែរ​ ចាប់តាំងពីការផ្ទុះឡើងនៃ​ជម្លោះនេះ​ និង «បានប្រឹងប្រែងលើកកម្ពស់ការចរចាសន្តិភាព​»។

ក្នុងរយៈពេល ២សប្តាហ៍កន្លងមកនេះ សហរដ្ឋអាមេរិក និងអ៊ីរ៉ង់ បានបើក​ការ​វាយប្រហារម្ដង​ម្កាល​ ខណៈដែលភាពតានតឹងបានកើនឡើងនៅទូទាំងតំបន់។ នៅព្រឹកថ្ងៃនេះ កងឆ្មាំបដិវត្តន៍ឥស្លាមអ៊ីរ៉ង់ (IRGC) បានឲ្យ​ថា ខ្លួនបានវាយប្រហារគោលដៅយោធាសំខាន់ៗចំនួន ១៨ របស់សហរដ្ឋអាមេរិក នៅឈូងសមុទ្រពែក្ស ដើម្បីឆ្លើយតបទៅនឹងការវាយប្រហារដោយមីស៊ីលរបស់សហរដ្ឋអាមេរិកទៅលើកន្លែងកម្សាន្តមួយកន្លែង​ ទីតាំងឧស្សាហកម្មមួយកន្លែង​ និងតំបន់ក្បែរទីក្រុង Karaj និង Nazarabad នៅ​ភាគខាងលិចនៃ​ទីក្រុងតេអេរ៉ង់ រួមជាមួយនឹងមូលដ្ឋានកងឆ្មាំបដិវត្តន៍ក្នុងស្រុកមួយកន្លែង​ នៅតំបន់​ Pishva៕