ប្រធានាធិបតីអាមេរិក លោក​ Donald Trump បាននិយាយកាលពីល្ងាចថ្ងៃពុធ (ទី១០ ខែមិថុនា ឆ្នាំ២០២៦) ថា មេដឹកនាំអ៊ីរ៉ង់បានទូរស័ព្ទទៅ​រក​លោក​ដោយផ្ទាល់ ហើយបានស្នើសុំឲ្យ​លោក​បញ្ឈប់ប្រតិបត្តិ​ការ​ទម្លាក់គ្រាប់បែកដែលមានជាបន្តបន្ទាប់​​។ នេះបើយោងតាមប្រព័ន្ធ​ផ្សព្វផ្សាយ​ Fox News។

លោក Trump បានប្រាប់ប្រព័ន្ធ​ផ្សព្វផ្សាយ​ Fox News ក្នុងបទសម្ភាសន៍មួយថា កងកម្លាំងអាមេរិក បានវាយប្រហារអ៊ីរ៉ង់ដោយមីស៊ីល Tomahawk ចំនួន ៤៩គ្រាប់ នៅក្នុងការវាយប្រហារទម្លាក់គ្រាប់បែកចុងក្រោយរបស់ខ្លួន នា​ព្រឹកថ្ងៃព្រហស្បតិ៍ តាម​ពេលវេលា​នៅប្រទេស​អ៊ីរ៉ង់។

បើយោងតាមអ្នកសារ​ព័ត៌មានរបស់​ប្រព័ន្ធផ្សព្វផ្សាយ​ Fox News លោក Trey Yingst បាន​ឲ្យ​ដឹង​ថា លោក Trump បានបញ្ជាក់​បន្ថែម​ថា៖ «ប្រសិនបើអ៊ីរ៉ង់មិនទទួលយកលក្ខខណ្ឌរបស់សហរដ្ឋអាមេរិក សម្រាប់ការបញ្ចប់សង្គ្រាមទេ យើងនឹងទម្លាក់គ្រាប់បែកយ៉ាង​ខ្លាំង​ក្លាលើ​ពួកគេ នៅយប់ថ្ងៃស្អែក»។

តែ​យ៉ាងណាក្ដី​ កងឆ្មាំបដិវត្តន៍ឥស្លាមអ៊ីរ៉ង់ (IRGC) បានបដិសេធយ៉ាងឆាប់រហ័សថា ទីក្រុងតេអេរ៉ង់មិន​បានស្នើសុំឲ្យ​លោក Trump បញ្ឈប់ការទម្លាក់គ្រាប់បែកឡើយ​។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋ IRNA។

IRGC បាន​បញ្ជាក់​ថា ការអះអាង​របស់​លោក Trump ដែល​ថា មន្ត្រីអ៊ីរ៉ង់បានទាក់ទងទៅរូប​លោក ត្រូវបានបដិសេធយ៉ាង​ដាច់អហង្ការ ហើយវាគឺ​ជាការបិទបាំង ដើម្បី​គេច​ពី​ការ​បង្ក​សង្គ្រាម៕