ក្រសួងការបរទេសចិននិយាយនៅថ្ងៃព្រហស្បតិ៍នេះថា អធិបតេយ្យភាព សន្តិសុខ និងបូរណភាពទឹកដីរបស់ប្រទេសនៅក្នុងតំបន់ គួរតែត្រូវបានគោរព និងរក្សាឲ្យបានខ្ជាប់ខ្ជួន ក្រោយសហរដ្ឋអាមេរិក និងអ៊ីរ៉ង បើកការវាយប្រហារតាមច្រកអាកាសលើគ្នាទៅវិញទៅមក នៅថ្ងៃទី ២ជាប់ៗគ្នា ក្នុងនោះ លោកប្រធានាធិបតី Donald Trump សន្យាថា នឹងវាយប្រហារបន្ថែមទៀត បើសិនជាទីក្រុងតេអេរ៉ង់ មិនយល់ព្រមកិច្ចព្រមព្រៀងសន្តិភាពជាបន្ទាន់ទេនោះ ។

លោក Lin Jian គឺជាអ្នកនាំពាក្យក្រសួងការបរទេសចិននិយាយនៅក្នុងសន្និសីទសារព័ត៌មានថា ចិនមានការខ្វាយខ្វល់យ៉ាងខ្លាំងចំពោះស្ថានភាពបច្ចុប្បន្ន ។ ការងាកទៅរកការប្រើប្រាស់កម្លាំង មានតែធ្វើឲ្យភាពតានតឹងកាន់តែធ្ងន់ធ្ងរបន្ថែមទៀតប៉ុណ្ណោះ ហើយសកម្មភាពយោធា មិនអាចដោះស្រាយបញ្ហាបានឡើយ ។

នៅថ្ងៃព្រហស្បតិ៍នេះ សហរដ្ឋអាមេរិក និងអ៊ីរ៉ង់ បានវាយប្រហារតាមច្រកអាកាសលើគ្នាទៅវិញទៅមក ដែលជាការប្រយុទ្ធគ្នានៅថ្ងៃទី២ ជាប់ៗគ្នា ។

ការកើនឡើងអរិភាពនេះ បានចាប់ផ្តើមនៅដើមសប្តាហ៍នេះ ដោយសារការបាញ់ទម្លាក់ឧទ្ធម្ភាគចក្រ Apache ១គ្រឿងរបស់សហរដ្ឋអាមេរិក នៅជិតច្រកសមុទ្រ Hormuz ដែលបានបង្កឲ្យមានការវាយប្រហារសងសឹកគ្នាជាបន្តបន្ទាប់ នៅទូទាំងប្រទេសអ៊ីរ៉ង់ និងលើមូលដ្ឋានរបស់សហរដ្ឋអាមេរិក នៅជុំវិញតំបន់ឈូងសមុទ្រ ។

វាគឺជាការគំរាមកំហែងធ្ងន់ធ្ងរបំផុតមួយ ចំពោះបទឈប់បាញ់ដ៏ផុយស្រួយដែលបានព្រមព្រៀងគ្នា កាលពីខែមេសា ដោយបំផ្លាញក្តីសង្ឃឹមថា នឹងបញ្ចប់យ៉ាងឆាប់រហ័សសង្គ្រាមដែលបានចាប់ផ្តើមកាលពីចុងខែកុម្ភៈ ជាមួយនឹងការវាយប្រហារតាមអាកាសរួមគ្នា រវាងសហរដ្ឋអាមេរិក និងអ៊ីស្រាអែល លើអ៊ីរ៉ង់ ៕