ប្រភពសន្តិសុខបានប្រាប់​ឲ្យ​ដឹង​នៅ​ថ្ងៃព្រហស្បតិ៍ (ទី១១ ខែមិថុនា ឆ្នាំ២០២៦) នេះ​ថា បុគ្គលិកយ៉ាងហោចណាស់ ២២នាក់ បានបាត់បង់ជីវិត ​ក្នុងហេតុការណ៍​ធ្លាក់​ឧទ្ធម្ភាគចក្រយោធា នៅ​តំបន់​ Kashmir របស់​ប្រទេស​ប៉ាគីស្ថាន ខណៈដែលពិធី​បុណ្យ​សព ត្រូវបានធ្វើឡើង​រួម​គ្នា​​នៅរដ្ឋធានី Muzaffarabad របស់​ដែន​ដីនេះ។

វីដេអូពីកន្លែងកើតហេតុបានបង្ហាញឲ្យ​ឃើញ​ផ្សែងខ្មៅដ៏​ក្រាស់ឃ្មឹក​ហុយឡើង​ទ្រលោម នៅ​ពីក្រោយអគារដែលឧទ្ធម្ភាគចក្របានធ្លាក់​។ ប្រភពបាននិយាយថា អ្នកស្លាប់រួមមានទាហាន ១៩​នាក់ និង​មន្ត្រីយោធាជាន់​​​ខ្ពស់ ៣នាក់​​។

យោធាប៉ាគីស្ថានបានឲ្យ​ដឹង​កាលពីថ្ងៃពុធថា ឧទ្ធម្ភាគចក្រ Mi-17 បានធ្លាក់ដោយសារតែកំហុសឆ្គង​បច្ចេកទេស ហើយអ្នកដែលនៅលើយន្តហោះទាំងអស់បានបង់ជីវិត​។ យោធាបាន​បន្ថែម​ថា ការស៊ើបអង្កេតមួយត្រូវបានបញ្ជាឲ្យ​ធ្វើឡើង ដើម្បី​ស្វែង​រក​មូលហេតុកំហុស​ឆ្គង​បច្ចេកទេសពិតប្រាកដ ដែល​នាំ​ឲ្យមាន​គ្រោះថ្នាក់នេះ៕