នាយករដ្ឋមន្ត្រីកាណាដា លោក Mark Carney បានប្រារព្ធពិធីបើកព្រឹត្តិការណ៍ FIFA World Cup ឆ្នាំ២០២៦ កាលពី​ថ្ងៃព្រហស្បតិ៍ (ទី១១ ខែមិថុនា ឆ្នាំ២០២៦) ដោយបានបង្ហាញពីការវិនិយោគរបស់រដ្ឋាភិបាលលើវិស័យកីឡាដ៏ច្រើនបំផុត ក្នុងប្រវត្តិសាស្ត្រ ខណៈព្រឹត្តិការណ៍ប្រកួត​បាល់​ទាត់ពិភពលោកដ៏ធំបំផុតក្នុងប្រវត្តិសាស្ត្រ កំពុងដំណើរការនៅទូទាំងតំបន់​អាមេរិកខាងជើង។

លោក Carney បានលើក​ឡើង​នៅក្នុងសេចក្តីថ្លែងការណ៍មួយថា៖ «ជាលើកដំបូង ការប្រកួតបាល់ទាត់ពិភពលោកផ្នែកបុរស (FIFA Men's World Cup) នឹងត្រូវលេងនៅប្រទេសកាណាដា។ ដោយមាន​ការប្រកួតនៅទីក្រុង Vancouver និង Toronto បារកីឡា សណ្ឋាគារ និងបន្ទប់ទទួលភ្ញៀវ នឹងពោរពេញទៅដោយអ្នកគាំទ្រមកពីទូទាំងប្រទេសកាណាដា និងជុំវិញពិភពលោក»។

លោកបានកត់សម្គាល់ថា រដ្ឋាភិបាលកាណាដាបានធ្វើការវិនិយោគដ៏ធំបំផុតលើវិស័យកីឡា ក្នុងប្រវត្តិសាស្ត្ររបស់​ប្រទេស​ ដោយបានប្តេជ្ញាចិត្តលៃ​ទឹក​ប្រាក់​ជាង ៧៥០លានដុល្លារ ដើម្បីគាំទ្រដល់អត្តពលិកគ្រប់កម្រិត។ មូលនិធិនេះគាំទ្រដល់មជ្ឈមណ្ឌលបណ្តុះបណ្តាលបាល់ទាត់ជាតិកាណាដា និងរួមបញ្ចូលគម្រោងបាល់ទាត់ចំនួន ៣៣០​ ដែលត្រូវបានប្រកាសកាលពីខែមុន រាប់​ចាប់ពីការមើលការប្រកួតផ្សាយ​ផ្ទាល់ រហូតដល់កម្មវិធីវប្បធម៌ដែលមានប្រធានបទបាល់ទាត់។

លោកនាយករដ្ឋមន្ត្រី បានបន្ថែម​ថា៖ «ព្រឹត្តិការណ៍ FIFA World Cup ត្រូវបានគេព្យាករថា នឹងបង្កើត និងគាំទ្រការងារជិត ២៥.០០០កន្លែង និងបន្ថែម ២ពាន់លានដុល្លារដល់សេដ្ឋកិច្ចរបស់ប្រទេសកាណាដា»។

គួរបញ្ជាក់​ថា ការប្រកួតនេះ ដែលរៀបចំរួមគ្នាដោយកាណាដា ម៉ិកស៊ិក និងសហរដ្ឋអាមេរិក នឹងចាប់ផ្តើមពីថ្ងៃទី​១១ ខែមិថុនា ដល់ថ្ងៃទី១៩ ខែកក្កដា ហើយ​ប្រមូលផ្តុំប្រទេសចំនួន ៤៨ សម្រាប់ការប្រកួតចំនួន ១០៤ប្រកួត​ នៅទូទាំងទីក្រុងចំនួន ១៦។ កាណាដានឹងធ្វើជាម្ចាស់ផ្ទះការប្រកួតចំនួន ១៣ប្រកួត នៅទីក្រុង Toronto និង Vancouver៕