ប្រភពមួយបានប្រាប់សារព័ត៌មាន Reuters ​នៅថ្ងៃសុក្រ (ទី១២ ខែមិថុនា ឆ្នាំ២០២៦) នេះ​ថា អនុស្សរណៈ រវាងសហរដ្ឋអាមេរិក និងអ៊ីរ៉ង់ ដើម្បីបញ្ឈប់សង្គ្រាមរបស់ភាគី​ទាំង​២ អាចត្រូវបានចុះហត្ថលេខា នៅថ្ងៃទី១៤ ខែមិថុនា ដោយទីក្រុងហ្សឺណែវរបស់​ប្រទេស​ស្វីស បានក្លាយជាទីកន្លែងដ៏ទំនងបំផុត ក្នុង​ការ​ធ្វើ​ជាម្ចាស់​ផ្ទះ​។

ប្រភពនេះបាននិយាយថា ភាសានៅក្នុងអនុស្សរណៈនេះ នៅតែស្ថិត​ក្នុង​ដំណាក់​កាល​បញ្ចប់ចុង​ក្រោយ​ ហើយប្រទេស​អ៊ីរ៉ង់កំពុងប្រកាន់ខ្ជាប់នូវគោល​ជំហររបស់ខ្លួន ដែល​ថា កិច្ចព្រមព្រៀងនេះ ក៏ត្រូវតែបញ្ចប់ការប្រយុទ្ធគ្នានៅលីបង់ផងដែរ ជាកន្លែងដែលអ៊ីស្រាអែលបានប្រយុទ្ធជាមួយ​កងជីវពលហេសបូឡាដែលគាំទ្រដោយអ៊ីរ៉ង់។

គោលបំណង គឺដើម្បីបញ្ចប់ពាក្យពេចន៍ក្នុង​អនុស្សរណៈនេះ នៅថ្ងៃទី១៣ ខែមិថុនា ដូច្នេះ កិច្ចព្រមព្រៀងនេះ អាចត្រូវបានចុះហត្ថលេខាដោយអនុប្រធានាធិបតីអាមេរិក លោក J.D. Vance និងប្រធានសភាអ៊ីរ៉ង់ លោក Mohammed Baqer Qalibaf។ មិនទាន់មានទីកន្លែងណាមួយត្រូវបានកំណត់នៅឡើយទេ ប៉ុន្តែទីក្រុងហ្សឺណែវ បានក្លាយជាទីកន្លែងដែលទំនងជាគេ​បំផុត។

ប្រធានាធិបតីអាមេរិក លោក Donald Trump បាននិយាយកាលពី​ថ្ងៃទី១១ ខែមិថុនាថា លោកកំពុងលុបចោលការវាយប្រហារថ្មីលើអ៊ីរ៉ង់ ពីព្រោះកិច្ចព្រមព្រៀងនេះរួចរាល់ហើយ។ លោកបានប្រាប់អ្នកសារ​ព័ត៌មានថា៖ «យើងទើបតែបានដោះស្រាយសង្គ្រាមជាមួយអ៊ីរ៉ង់បានយ៉ាងល្អប្រសើរ​»។

ប៉ុន្តែលក្ខខណ្ឌនៃកិច្ចព្រមព្រៀង ដូចដែលបានពិពណ៌នានៅថ្ងៃទី១២ ខែមិថុនា ដោយមន្ត្រីអ៊ីរ៉ង់ ហាក់ដូចជាផ្តល់ជូនទីក្រុងតេអេរ៉ង់នូវអ្វីដែលខ្លួនបានទាមទារ រហូតមកដល់ពេលនេះ៕