ខណៈពេលដែលក្រុមប៉ាឡេស្ទីននានា ជួបប្រជុំគ្នានៅទីក្រុងគែររបស់ប្រទេសអេហ្ស៊ីប ដើម្បីពិភាក្សា អំពីការគ្រប់គ្រងនាពេលអនាគត នៅតំបន់ហ្កាហ្សា ក្រុមជំនួយ និងអ្នកវិភាគ ព្រមានថា ការពិតនៅលើដីជាក់ស្ដែង កំពុងធ្វើដំណើរផ្ទុយពីទិសដៅក្របខ័ណ្ឌនៃបទឈប់បាញ់នេះ ដែលបានបើកផ្លូវឲ្យមានការកសាងឡើងវិញ និងការស្តារឡើងវិញ។
បើទោះបីការចរចានៅតែបន្តប្រព្រឹត្តទៅក៏ដោយ ក៏អ៊ីស្រាអែលបានពង្រីកការគ្រប់គ្រងរបស់ខ្លួនលើផ្នែកធំៗនៃតំបន់នោះ ការវាយប្រហារនៅតែបន្តមាន លទ្ធភាពចូលទៅប្រើប្រាស់ជំនួយមនុស្សធម៌នៅតែត្រូវបានរឹតត្បិតយ៉ាងខ្លាំង ហើយការកសាងឡើងវិញមិនទាន់ចាប់ផ្តើមនៅឡើយទេ ដែលធ្វើឲ្យប្រជាជនជាង ២លាននាក់របស់តំបន់ហ្កាហ្សា ជាប់នៅក្នុងស្ថានភាពវិបត្តិមនុស្សធម៌ធ្ងន់ធ្ងរ។
អ្នកសម្របសម្រួលផ្នែកតស៊ូមតិ និងទំនាក់ទំនងនៅអង្គការ ActionAid Palestine លោក Riham Jafari បានប្រាប់សារព័ត៌មាន Anadolu ថា៖ «ការអនុវត្តដំណាក់កាលទី១ នៃបទឈប់បាញ់ នៅតំបន់ហ្កាហ្សា នៅតែមានកម្រិត និងមិនស៊ីសង្វាក់គ្នា ជាពិសេសដោយសារតែការវាយប្រហារតាមអាកាសម្តងហើយម្តងទៀត»។
យោងតាមតួលេខរបស់ស្ថាប័នសុខាភិបាលតំបន់ហ្កាហ្សា បានឲ្យដឹងថា មនុស្សប្រហែល ១.០០០នាក់ ត្រូវបានសម្លាប់ និង ៣.០០០នាក់ រងរបួស ចាប់តាំងពីបទឈប់បាញ់បានចាប់ផ្តើម។
គួរបញ្ជាក់ថា កាលពីខែកញ្ញាឆ្នាំមុន ប្រធានាធិបតីអាមេរិក លោក Donald Trump បានប្រកាសផែនការ ២០ចំណុចដែលគូសបញ្ជាក់ពីក្របខ័ណ្ឌមួយ ដោយដំណាក់កាលទី១ រួមមានបទឈប់បាញ់ និងការដោះដូរអ្នកទោស រវាងអ៊ីស្រាអែល និងក្រុមប៉ាឡេស្ទីន។
តែយ៉ាងណាក្ដី ការអនុវត្តកិច្ចព្រមព្រៀងនៅតែមិនទាន់បានសម្រេចនៅឡើយ ស្របពេលដែលប្រតិបត្តិការរបស់យោធាអ៊ីស្រាអែលកំពុងបន្តមាន ហើយការរឹតបន្តឹងផ្នែកមនុស្សធម៌មានកាន់តែខ្លាំងឡើងៗ។ ហើយអ្វីដែលសំខាន់នោះ គឺថា កាលពីខែឧសភា អ៊ីស្រាអែលបានបញ្ជាក់ថា ខ្លួនបានបង្កើនការគ្រប់គ្រងដល់ ៦០ភាគរយនៃតំបន់ហ្កាហ្សា ខណៈដែលនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា លោកបានណែនាំយោធាឲ្យគ្រប់គ្រងរហូតដល់ ៧០ភាគរយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
