​ស្នូកឃ័រ​៖ ​កីឡាករ​ការពារ​តំណែង​ជើងឯក​ស្នូកឃ័រ​ពិភពលោក Mark Selby បាន​ធ្លាក់​ចេញពី​ការប្រកួត​ហើយ​ត្រឹម​វគ្គ ១៦នាក់​ចុងក្រោយបន្ទាប់ពី​រង​បរាជ័យ​ក្រោម​ស្នាដៃ​កីឡាករ​ចិន Yan Bingtao​។ ​​ក្នុងការ​ប្រកួត​នេះក៏មាន​ ១​ហ្វ្រេ​ម​បាន​បំបែក​កំណត់ត្រា​ហ្វ្រេ​ម​ដែល​លេង​យូរ​បំផុត​ដល់​ទៅ ៨៥នាទី ២២វិនាទី​នៅ​ហ្វ្រេ​ម​ទី២២ រវាង​កីឡាករ​ទាំងពីរដែល​បាន​បំបែក​កំណត់ត្រា​ចាស់ ៥នាទី ៥១វិនាទី​។

​កីឡាករ​ចិនដែលជា​ជើងឯក Masters កាលពីដើមឆ្នាំ Yan Bingtao បាន​នាំមុខ ១១-១០ហ្វ្រេ​ម និង​បាន​បន្ត​យកឈ្នះ ២ហ្វ្រេ​ម​បន្ទាប់​ទៀត​។ ​​កីឡាករ​វ័យ ២២ឆ្នាំ Yan Bingtao នឹង​បន្ត​ជួប​ជាមួយ​ជើងឯក ៣​សម័យ Mark Williams វ័យ ៤៧ឆ្នាំនៅ​វគ្គ ៨នាក់​ចុងក្រោយ​។ ​​រីឯ​កីឡាករ​អូស្ត្រាលី Neil Robertson ដែលជា​បេក្ខភាព​ប្រជែង​ជើង​ឆ្នាំនេះ កំពុង​តាម​ពីក្រោយ​កីឡាករ​ម្ចាស់ផ្ទះ​អង់គ្លេស Jack Liswoski ៩-៧ហ្វ្រេ​ម​។ ​

​​ចំណែក​ជើងឯក​ឆ្នាំ២០១៩ Judd Trump កំពុង​នាំមុខ​កីឡាករ​ស្កុ​ត​ឡេ​ន Anthony McGill ១០-៦ហ្វ្រេ​ម​។ ​​ដោយឡែក​សំរាប់​លទ្ធផល​ដែល​បានបញ្ចប់​ឆ្លងទៅ​វគ្គ ៨នាក់​ចុងក្រោយ​ទៅហើយនោះ​រួមមាន Ronnie O’Sullivan យកឈ្នះ Mark Allen ១៣-៤ហ្វ្រេ​ម​ឡើង​ជួប​ជាមួយ Stephen Maguire ដែល​បាន​យកឈ្នះ Zhao Xintong និង Mark Williams យកឈ្នះ​កីឡា​ករវែល Jackson Page ១៣-៣ហ្វ្រេ​ម​៕

​អត្ថបទ​៖​នាង សុភា​វុ​ធ