ប្រទេស​ស៊ុយអែត បានឲ្យ​ដឹង​នៅថ្ងៃសៅរ៍ (ទី១៣ ខែមិថុនា ឆ្នាំ២០២៦) នេះ​ថា ខ្លួនបានប្រញាប់​ប្រញាល់​បញ្ចេញ​យន្តហោះចម្បាំង JAS 39 Gripen ចំនួន ២គ្រឿង​ នៅ​មួយថ្ងៃមុននេះ​ ដើម្បីស្ទាក់យន្តហោះប្រយុទ្ធ​របស់រុស្ស៊ី ២គ្រឿង ដែលហោះពីលើសមុទ្របាល់ទិកជិតដែនអាកាសរបស់ខ្លួន។

ឧប្បត្តិហេតុទាំង ២នេះ បានកើតឡើងកាលពី​ថ្ងៃសុក្រ នៅភាគខាងត្បូង និងភាគ​ខាងជើងនៃសមុទ្របាល់ទិក​។ យោធាស៊ុយអែតបានឲ្យ​ដឹង​នៅក្នុងសេចក្តីថ្លែងការណ៍មួយថា​ យន្តហោះចម្បាំងរបស់អង្គការណាតូ (NATO) ក៏បានចេញ​ប្រតិបត្តិការ​ផង​ដែរ​ «ដើម្បីរក្សាសន្តិសុខនៅក្នុងដែនអាកាសរួម» ។ យ៉ាង​ណាក្ដី យោធាបាន​បញ្ជាក់​​ថា ដែនអាកាសរបស់​ស៊ុយអែត មិនត្រូវបានរំលោភបំពានឡើយ ទាក់ទងនឹងឧប្បត្តិហេតុ​នោះ​។

 លោកស្រីអនុឧត្តមនាវីឯក Ewa Skoog Haslum ប្រធានប្រតិបត្តិការរួមរបស់កងកម្លាំងប្រដាប់អាវុធ បានលើក​ឡើង​នៅក្នុងសេចក្តីថ្លែងការណ៍ថា៖ «សកម្មភាពរបស់រុស្ស៊ី គឺធ្ងន់ធ្ងរ និងបង្កើតជាគំរូនៃអាកប្បកិរិយាដដែលៗ ដែលគំរាមកំហែងទាំងបូរណភាពទឹកដី និងសន្តិសុខរបស់យើង»។

ប្រទេស​ស៊ុយអែតបានចូលរួមជាមួយអង្គារណាតូ ក្នុងខែមីនា ឆ្នាំ២០២៤។ ភាពតានតឹង នៅ​សមុទ្របាល់ទិក បានកើនឡើងយ៉ាងខ្លាំង ចាប់តាំងពីមាន​ការឈ្លានពានទ្រង់ទ្រាយធំរបស់រុស្ស៊ីលើអ៊ុយក្រែន ក្នុងឆ្នាំ២០២២​៕