កាលពីថ្ងៃអាទិត្យចុងសប្ដាហ៍នេះ នគរបាលទីក្រុងហ្សឺណែវបានបាញ់ឧស្ម័នបង្ហូរទឹកភ្នែកទៅលើក្រុមបាតុករដែលបានដុតរថយន្តមួយគ្រឿង និងវាយបំបែកបង្អួចនៅទីភ្នាក់ងារអង្គការសហប្រជាជាតិមួយ ខណៈពួកគេបញ្ចេញកំហឹងរបស់ខ្លួននៅឯកិច្ចប្រជុំកំពូលក្រុមមេដឹកនាំនៃប្រទេសទាំងប្រាំពីរ G7 ដែលហៀបនឹងធ្វើឡើងនៅទូទាំងព្រំដែននៅក្នុងប្រទេសបារាំង។

មនុស្សប្រហែល ២ម៉ឺននាក់ បានប្រមូលផ្តុំគ្នាសម្រាប់ការដង្ហែក្បួន ដែលដំបូងឡើយដោយសន្តិវិធី ប៉ុន្តែក្រោយមកក្រុមបាតុករបានកំណត់គោលដៅលើអ្វីដែលពួកគេបានពិពណ៌នាថាជានិមិត្តរូបនៃមូលធននិយម និងពហុភាគីនិយម រួមទាំងរថយន្ត Tesla ដែលចតនៅចំណត និងការិយាល័យអង្គការសហប្រជាជាតិ។

បុគ្គលិករបស់សារព័ត៌មាន Reuters ដែលបានមើលឃើញហេតុការណ៍នោះ បាននិយាយថា ក្រុមបាតុករបានគាស់ឥដ្ឋចេញពីដីដើម្បីគប់ទៅលើនគរបាល ខណៈកុមារមួយចំនួនបានស្រែកយំ នៅពេលឧស្ម័នបង្ហូរទឹកភ្នែកបានហុយឡើងលើដងផ្លូវដែលដុតកម្ដៅដោយពន្លឺថ្ងៃនៅក្នុងទីក្រុងហ្សឺណែវ។នៅទីក្រុងហ្សឺណែវ អាជីវកម្មត្រូវបានបិទ ហើយនគរបាលបង្ក្រាបកុបកម្មរាប់រយនាក់ត្រូវបានដាក់ពង្រាយនៅតាមដងផ្លូវ ស្របពេលមានការព្រួយបារម្ភជាមុនអំពីអំពើហិង្សា។ការតវ៉ាគឺជារឿងធម្មតានៅក្នុងការជួបជុំក្រុមប្រទេសមានសេដ្ឋកិច្ចលូតលាស់ទាំង៧ ឬ G7 ក្នុងរយៈពេលប៉ុន្មានឆ្នាំមកនេះ ដោយក្រុមបាតុករជាច្រើនបានប្រើប្រាស់កិច្ចប្រជុំកំពូលនេះដើម្បីរិះគន់មូលធននិយម សកលភាវូបនីយកម្ម ការប្រែប្រួលអាកាសធាតុ និងវិសមភាព។

កិច្ចប្រជុំកំពូល G7 ចាប់ថ្ងៃទី១៥-១៧ ខែមិថុនា នៅរមណីយ៍ដ្ឋានទេសចរណ៍មាត់បឹងហ្សឺណែវ Evian-les-Bains របស់ប្រទេសបារាំង នឹងនាំមេដឹកនាំនៃប្រទេសបារាំង ចក្រភពអង់គ្លេស កាណាដា អាល្លឺម៉ង់ អ៊ីតាលី ជប៉ុន និងសហរដ្ឋអាមេរិក រួមជាមួយសហភាពអឺរ៉ុប មកជួបជុំគ្នា។បាតុកម្មក៏ត្រូវបានធ្វើឡើងនៅទូទាំងមហាសមុទ្រអាត្លង់ទិកផងដែរ។នៅកណ្តាលទីក្រុង Calgary ប្រទេសកាណាដា ក្រុមអ្នកតវ៉ារាប់រយនាក់បានប្រមូលផ្តុំគ្នាកាន់ទង់ជាតិ និងបដា ស្រែកពាក្យស្លោក និងថ្លែងសុន្ទរកថា។យោងតាមស៊ីនហួ ក្រុមបាតុករបានសម្តែងការព្រួយបារម្ភអំពីសង្គ្រាម និងបញ្ហាបរិស្ថាន និងបានតវ៉ាប្រឆាំងនឹងសម្ដីរបស់លោក Trump ទាក់ទងនឹងអធិបតេយ្យភាពរបស់កាណាដា។កិច្ចប្រជុំកំពូល G7 ត្រូវបានគ្រោងនឹងបើកនៅថ្ងៃអង្គារស្អែកនេះ នៅស្រុក Kananaskis ដែលជាភូមិភ្នំមួយចម្ងាយប្រហែល ១០០ គីឡូម៉ែត្រភាគខាងលិចនៃទីក្រុង Calgary ខេត្ត Alberta ប្រទេសកាណាដា៕