ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអាទិត្យថា លោកបាននិយាយជាមួយប្រធានាធិបតីសហរដ្ឋអាមេរិក លោក Donald Trump និងបានពិភាក្សាអំពីកិច្ចខិតខំប្រឹងប្រែងដើម្បីសម្រេចបាននូវការបញ្ចប់សង្គ្រាមជាងបួនឆ្នាំ មុនពេលកិច្ចប្រជុំ G7 នៅប្រទេសបារាំងនៅសប្តាហ៍នេះ។

លោក Zelenskyy បានសរសេរនៅលើបណ្ដាញសង្គម Telegram ថា លោកបានជូនពរលោក Trump ឲ្យជួបតែភាពរីករាយនៅថ្ងៃកំណើតគម្រប់៨០ ឆ្នាំ និងបានថ្លែងអំណរគុណដល់លោកចំពោះជំនួយដែលផ្តល់ដោយទីក្រុងវ៉ាស៊ីនតោនពេញមួយជម្លោះ។

លោក Zelenskyy បាននិយាយថា រូបលោកសូមជូនពរលោកប្រធានាធិបតី Trump ឲ្យទទួលបានជោគជ័យ ជាដំបូង និងសំខាន់បំផុតក្នុងកិច្ចខិតខំប្រឹងប្រែងរបស់លោកក្នុងការបញ្ចប់សង្គ្រាមរបស់រុស្ស៊ីប្រឆាំងនឹងអ៊ុយក្រែន។

មុនពេលកិច្ចប្រជុំក្រុមទាំងប្រាំពីរនៅទីក្រុង Evian-les-Bains ជាកន្លែងដែលមេដឹកនាំនៃសហរដ្ឋអាមេរិក និងប្រទេសអ្នកមានផ្សេងទៀតត្រូវពិភាក្សាអំពីសង្គ្រាមរបស់រុស្ស៊ីនៅអ៊ុយក្រែននៅថ្ងៃអង្គារស្អែកនេះ លោក Zelenskyy បាននិយាយថា លោកបានពិភាក្សាជាមួយលោក Trump អំពីជំហររបស់ដៃគូអន្តរជាតិរបស់ខ្លួន។

លោកថា ពួកលោកបាននិយាយអំពីអ្វីដែលអាចជួយនាំសន្តិភាពឱ្យកាន់តែខិតជិតឥឡូវនេះ ហើយរូបលោកបានធ្វើបច្ចុប្បន្នភាពដល់ប្រធានាធិបតីអំពីការវិវត្តចុងក្រោយបំផុតនៅលើសមរភូមិ និងរបៀបដែលជំហររបស់អ៊ុយក្រែនបានពង្រឹង។ពួកលោកមានគំនិតល្អៗមួយចំនួនដែលអាចជួយនាំសន្តិភាពឱ្យកាន់តែខិតជិត។

ថ្លែងនៅពេលក្រោយមកក្នុងសុន្ទរកថាវីដេអូពេលយប់របស់មេដឹកនាំអ៊ុយក្រែនរូបនេះ លោកបាននិយាយថា លោក និងលោក Trump បានយល់ព្រមជួបគ្នាក្នុងអំឡុងពេលកិច្ចប្រជុំនៅទីក្រុង Evian-les-Bains៕