ភ្នំពេញ៖ ឯកឧត្តមរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងភាគីអង្គការទេសន្តរប្រវេសន៍អន្តរជាតិ (IOM) បានប្តេជ្ញារួមគ្នាបន្តកិច្ចសហប្រតិបត្តិការក្នុងការជួយគាំទ្រ និងផ្តល់កិច្ចគាំពារដល់ពលករទេសន្តរប្រវេសន៍កម្ពុជានៅក្រៅប្រទេស។

នៅក្នុងជំនួបការងារ រវាងលោកស្រី Nenette Motus នាយកអង្គការទេសន្តរប្រវេសន៍អន្តរជាតិ​ប្រចាំតំបន់​អាស៊ី និងប៉ាស៊ីហ្វិក និងលោកស្រី KRISTIN PARCO ប្រធានបេសកកម្មអង្គការ​ទេសន្តរប្រវេសន៍​អន្តរជាតិប្រចាំនៅកម្ពុជា កាលពីព្រឹកថ្ងៃទី២៥ មេសា ឆ្នាំ២០២២នេះ នៅទីស្តីការ​ក្រសួង ឯកឧត្តមរដ្ឋមន្រ្តី មានប្រសាសន៍ថា​ អង្គការទេសន្តរប្រវេសន៍អន្តរជាតិ បានដើរតួនាទីយ៉ាង​សំខាន់​លើការផ្សព្វផ្សាយបញ្ហាទេសន្តរប្រវេសន៍​ប្រកបដោយ ស្ថិរភាព ជាដៃគូមិនអាចខ្វះបាន​នៅ​ក្នុងតំបន់​អាស៊ីប៉ាស៊ីហ្វិក និងកម្ពុជា។

ជាពិសេសស្ថិតក្នុងដំណាក់កាលកូវីដ-១៩​ ដែលពលករមិនអាចធ្វើការឆ្លងកាត់បាន ត្រូវជាប់គាំងនៅ​តាម​បណ្តាប្រទេសនីមួយៗ ត្រូវបាន អង្គការមួយនេះ បានធ្វើការដោះស្រាយបញ្ហាប្រកបដោយ​ប្រសិទ្ធភាព។

ក្នុងឱកាសនោះ ភាគីអង្គការ បានគូសបញ្ជាក់ពីគម្រោងខាងលើ ដែលជាកម្មវិធីថ្នាក់តំបន់ អនុវត្ត​ក្រោម​ការ​ដឹកនាំ របស់អង្គការទេសន្តរប្រវេសន៍អន្តរជាតិ ដោយទទួលបានការគាំទ្រពីទីភ្នាក់ងារ​ស្វីស​សម្រាប់ការ​អភិវឌ្ឍ និងកិច្ច សហប្រតិបត្តិការ។

លោកស្រី បានបន្តថា នៅចន្លោះឆ្នាំ ១៩៩៨-២០០២ លោកស្រីធ្លាប់ជាប្រធានអង្គការ​ប្រចាំប្រទេស​កម្ពុជា ហើយលោកស្រីពិតជាមានក្តីរីករាយជាខ្លាំងដែលបានបំពេញទស្សនកិច្ចនៅកម្ពុជាសារជាថ្មី ដោយមើលឃើញថា ​កម្ពុជា​មានការរីកចម្រើនប្លែកពីមុនច្រើន​ ជាពិសេសក្រសួងការងារ ក៏ឃើញថា​មានវឌ្ឍនភាពច្រើនផងដែរ។

ខណៈកម្ពុជាត្រូវធ្វើជាម្ចាស់ផ្ទះ ក្នុងកិច្ចប្រជុំអាស៊ានសម្រាប់ឆ្នាំនេះ អង្គការចង់ផ្តល់ការគាំទ្រ​លើ​បញ្ហាបច្ចេកទេស និងឯកសារមួយចំនួន ​ក្នុងករណីមានរបៀបវារៈ ​ពាក់ព័ន្ធទៅនឹងកិច្ចប្រជុំ ស្តីពី​ពលករ​ទេសន្តរប្រវេសន៍នេះ និងផ្តល់ជំនួយបច្ចេកទេសលើគោលនយោបាយ​ទេសរន្តប្រវេសន៍​នៅកម្ពុជាផងដែរ។

ឆ្លើយតបនឹងការជួយរបស់ភ្ញៀវ ឯកឧត្តមរដ្ឋមន្ត្រី បញ្ជាក់ថា ចំពោះកិច្ចប្រជុំអាស៊ានដែលកម្ពុជា​ត្រូវធ្វើជាម្ចាស់ផ្ទះ នៅក្នុងឆ្នាំនេះ ពិតជាមិនអាចរំលងពីប្រធានបទ ព័ន្ធពាក់ទៅនឹងពលករ​ទេសន្តរប្រវេសន៍នេះឡើយ ​ដូច្នេះបានខាង ​អង្គការIOM ​ផ្តល់ការគាំទ្រជួយលើបញ្ហាបច្ចេកទេស និង​ឯកសារផងដែរនោះ វាផ្តល់នូវធាតុចូលកាន់តែច្រើន បន្ថែមទៀត សម្រាប់ធ្វើការដោះស្រាយនូវ​ចំណុច​ប្រឈមមួយចំនួនដែលត្រូវធ្វើការរួមគ្នាដោះស្រាយ។

សម្រាប់គោលនយោបាយទេសន្តរប្រវេសន៍ ដែលក្រសួងការងារ បានធ្វើការជាមួយអង្គការ​ពលកម្ម​អន្តរជាតិ (ILO) ឯកឧត្តម ចង់ឃើញគោលនយោបាយមួយនេះ​ ក្លាយជាគោលនយោបាយជាតិ ដោយ​មានការអនុម័តគាំទ្រពី រដ្ឋាភិបាលកម្ពុជា ​ហើយកម្ពុជា​ក៏ត្រូវការជួយជ្រោមជ្រែងបន្ថែមពីខាង IOM និងដៃគូពាក់ព័ន្ធមួយចំនួនទៀត ​ដើម្បីឲ្យគោលនយោបាយនេះ​ កាន់តែរឹងមាំ និងធានាបាន​នូវ​សុវត្ថិភាពសម្រាប់ពលករទេសរន្តប្រវេសន៍៕អត្ថបទ ឈិត បូរ៉ាវី