សហរដ្ឋអាមេរិក និងអ៊ីរ៉ង់ ត្រូវការការចរចាដ៏​តតាក់តតាំ​ និងតានតឹងជាង ២ខែ ដើម្បីយល់ព្រមលើកិច្ចព្រមព្រៀងមួយ ដែល​បញ្ឈប់ការប្រយុទ្ធរបស់ភាគីទាំង​២ និងបើកច្រកសមុទ្រ Hormuz ឡើងវិញ។ ហើយ​ឥឡូវនេះ ត្រូវ​ដល់ផ្នែកលំបាកៗ​ហើយ។

កិច្ចព្រមព្រៀងបណ្ដោះអាសន្នដែលត្រូវ​បានប្រកាសដោយភាគីទាំង២ កាល​ពី​យប់​ថ្ងៃអាទិត្យ (ទី១៤ ខែមិថុនា ឆ្នាំ២០២៦) ពោលគឺ​នៅ​ថ្ងៃ​ខួបកំណើតគម្រប់វ័យ​ ៨០​ឆ្នាំរបស់លោក​ប្រធានាធិបតី Donald Trump ទុកចន្លោះ​ពេល​ដ៏​តូចចង្អៀតត្រឹម​ ៦០​ថ្ងៃ ដើម្បីចរចាបញ្ហា ជុំវិញកម្មវិធីនុយក្លេអ៊ែររបស់អ៊ីរ៉ង់ ជា​អ្វី​ដែលបានធ្វើឲ្យ​អ្នកកាន់តំណែងមុនរបស់​លោក ​ជួប​ការ​លំបាកអស់រយៈពេលជាច្រើនឆ្នាំ។

អនុស្សរណៈនៃការយោគយល់គ្នា ដែលមិនទាន់ត្រូវបានចេញផ្សាយនៅ​ឡើយ​នោះ​ នឹងត្រូវបានចុះហត្ថលេខាជាផ្លូវការនៅថ្ងៃទី១៩​ ខែមិថុនា។ គម្លាតនោះបានបង្កើនលទ្ធភាពកាន់​ខ្ពស់​ ដែលថា ព័ត៌មានលម្អិត ស្ដីពី​ឯកសារ នៅតែមិនទាន់ដោះស្រាយ ហើយការចុះហត្ថលេខាអាចនឹងមិន​កើត​ឡើង​។ ភាពខុសគ្នាកំពុងលេចចេញឡើងហើយ​ដែរ រវាងភាគីទាំង២ នៅក្នុងអ្វីដែលអាចសម្រេចបានពិតប្រាកដ ខណៈពេលដែលជម្លោះកំពុងក្ដៅគគុក​ រវាងអ៊ីស្រាអែល និងលីបង់ ក៏អាចនាំឲ្យ​មានការបែកបាក់ផងដែរ។ លោក Trump អះអាងថា កិច្ចព្រមព្រៀងដំបូងនេះ ស្មើនឹងការចាប់ផ្តើមនៃដំណើរការមួយ ដែលនឹងនាំទៅរកសន្តិភាពនៅក្នុងតំបន់។

ប៉ុន្តែ​អ្នកមាន​មន្ទិល​សង្ស័យលើកិច្ចព្រមព្រៀងនេះ អះអាងថា វាអាចនឹងបញ្ចប់ដោយគ្មានអ្វីក្រៅតែ​ពីការផ្ដល់​​ភាព​​​ធូរស្រាល​បណ្តោះអាសន្ននោះឡើយ​ ដោយសារវាមាន​ភាព​មិនច្បាស់ ដែល​ថា តើ​មាន​ភាគីណា​បាន​ត្រៀមជាស្រេចហើយ​ ដើម្បីសម្របសម្រួលលើបញ្ហាធំៗដ៏​ចម្រូង​ចម្រាស​បំផុត ថា តើត្រូវផ្តល់ជំនួយសេដ្ឋកិច្ចប៉ុន្មានដល់អ៊ីរ៉ង់ ជា​អ្វីដែលត្រូវ​ដោះស្រាយ​ជាមួយ​​កម្មវិធីនុយក្លេអ៊ែររបស់ប្រទេស​នេះ​ និងថា តើ​កម្មវិធីមីស៊ីលបាលីស្ទិក​របស់ប្រទេស​នេះ ត្រូវ​ដោះស្រាយ​យ៉ាង​​ដូចម្ដេច​។

លោក Michael O’Hanlon នាយកស្រាវជ្រាវគោលនយោបាយការបរទេស នៅវិទ្យាស្ថាន Brookings Institution នៅ​សហរដ្ឋ​អាមេរិក បាននិយាយថា៖ «វាមិនមែនជារឿងមិនគួរឲ្យ​ជឿនោះ​ទេដែលភាគី​អាចមានកិច្ចព្រមព្រៀងបណ្តោះអាសន្ន ដើម្បីបើកច្រកសមុទ្រឡើងវិញ។ តែ​លើសពីនេះ កិច្ចព្រមព្រៀងគ្រប់ជ្រុង​ជ្រោយ​មួយមិនអាចទៅរួចនោះឡយ នៅពេលនេះ»៕