មេដឹកនាំនៃបណ្ដា​ប្រទេសមាន​ឧស្សាហកម្ម​លូតលាស់​ទាំង ៧ (G7) ជួប​ជុំ​គ្នា នៅឯ​រមណីយដ្ឋានមាត់បឹងមួយរបស់ប្រទេសបារាំង នៅថ្ងៃចន្ទ (ទី១៥ ខែមិថុនា ឆ្នាំ២០២៦) នេះ​ ពោល​គឺ​មិនយូរប៉ុន្មានបន្ទាប់ពីសហរដ្ឋអាមេរិក និងអ៊ីរ៉ង់ បានឲ្យ​ដឹង​ថា ភាគីទាំង២ បានឈានដល់កិច្ចព្រមព្រៀងបឋមមួយ ដើម្បីបញ្ចប់សង្គ្រាម។

ការពិភាក្សា អំពីជំហានបន្ទាប់ ស្ដីពី​អ៊ីរ៉ង់ នឹងជាបញ្ហាមួយក្នុងចំណោមបញ្ហាជាច្រើនដែលមេដឹកនាំពិភពលោកនៃ​ប្លុក​នេះ​ នឹងជជែកពិភាក្សា​គ្នា អំឡុងកិច្ចប្រជុំកំពូលថ្ងៃទី១៥-១៧ ខែមិថុនា ជា​ពេល​ដែលនឹងស្វែងរកផង​ដែរ​នូវ​ចំណុចរួម ពាក់​ព័ន្ធ​នឹង​សង្គ្រាម នៅប្រទេស​អ៊ុយក្រែន ការដោះស្រាយអតុល្យភាពសេដ្ឋកិច្ចពិភពលោក និងការស្វែងរកប្រភពរ៉ែសំខាន់ៗ នៅខាងក្រៅប្រទេសចិន ដែលជាអ្នកផ្គត់ផ្គង់ដ៏ធំ​បំផុត​។

ប្រធានាធិបតីអាមេរិក លោក Donald Trump នឹងទៅ​ដល់ទីក្រុង Evian-les-Bains នៅថ្ងៃទី១៥ ខែមិថុនានេះ​ ដើម្បី​ចូល​រួម​ការ​ជួប​ប្រជុំ​នេះ​ នៅពេលដែលបណ្ដា​មេដឹកនាំពិភពលោកមានការប្រុងប្រយ័ត្នកាន់តែខ្លាំងឡើងៗ ចំពោះសហរដ្ឋអាមេរិក ទោះបីជាមន្ត្រីបារាំងមាននូវ​ក្ដី​រីករាយ ដែលបានទទួលវត្តមានរបស់មេដឹកនាំ​រូប​នេះ​ បន្ទាប់ពីលោក​បានចាកចេញពីកិច្ចប្រជុំកំពូល G7 នៅកាណាដា ក្នុងឆ្នាំ២០២៥ មុនកាលកំណត់។

គួរបញ្ជាក់ថា មេដឹកនាំនៃ​ប្រទេស​ G7 ជាច្រើន ត្រូវបានរង​ប៉ះពាល់ដោយផ្ទាល់ដោយ​ចំណាត់​ប្រែប្រួល​មិន​ទៀង​របស់លោក Trump នៅលើឆាកអន្តរជាតិ​ ដែលបានធ្វើ​ឲ្យ​តំបន់​មជ្ឈិមបូព៌ា ពាណិជ្ជកម្មសកល និងការទូតច្របូក​ច្របល់​។ វិធានការ​របស់លោកបាននាំឲ្យ​មានសំណួរធំៗជាច្រើន​ អំពីការប្តេជ្ញាចិត្តរបស់សហរដ្ឋអាមេរិក ចំពោះសណ្តាប់ធ្នាប់ពិភពលោកក្រោយសង្គ្រាម ជាអ្វី​ដែលទីក្រុង​វ៉ាស៊ីន​តោន​បានជួយបង្កើតឡើង៕