ប្រធានាធិបតីលីបង់ លោក Joseph Aoun នៅ​ថ្ងៃចន្ទ (ទី១៥ ខែមិថុនា ឆ្នាំ២០២៦) នេះ បានសម្តែងក្តីសង្ឃឹមថា កិច្ចព្រមព្រៀង រវាងទីក្រុងវ៉ាស៊ីនតោន និងតេអេរ៉ង់ ដើម្បីបញ្ចប់សង្គ្រាម នៅ​តំបន់មជ្ឈិមបូព៌ា នឹងនាំ​ឲ្យ​ជម្លោះ រវាងអ៊ីស្រាអែល និងក្រុម​ហេសបូឡាលែង​មាន​ទាំង​ស្រុង​​។

នៅក្នុងសេចក្តីថ្លែងការណ៍មួយដែលចេញដោយការិយាល័យរបស់លោក លោក Aoun បានសរសើរការបញ្ជាក់នៃអនុស្សរណៈនេះ​ថា «សន្តិសុខ និងសុវត្ថិភាពរបស់ប្រទេសលីបង់ គឺជាផ្នែកសំខាន់មួយនៃកិច្ចខិតខំប្រឹងប្រែងណាមួយ ដើម្បីពង្រឹងស្ថិរភាពនៅក្នុងតំបន់នេះ»។

សេចក្តីថ្លែងការណ៍បានបន្ថែមថា ប្រជាជនលីបង់ «ទន្ទឹងរង់ចាំយ៉ាង​អន្ទះសារចង់​ឃើញ​ការយោគយល់ទាំងនេះ ប្រែក្លាយទៅជាជំហានជាក់ស្តែង ដែលបញ្ចប់វដ្តនៃអំពើហិង្សាទាំងស្រុង​ និងបង្កើតដំណាក់កាលនៃស្ថិរភាព សន្តិសុខ ការស្តារឡើងវិញ និងការកសាងឡើងវិញ»។

គួរបញ្ជាក់​ថា សហរដ្ឋអាមេរិក និងអ៊ីរ៉ង់ បានប្រកាស​ឲ្យ​ដឹង​​ថា ប្រទេស​ទាំង២ បានឈានដល់កិច្ចព្រមព្រៀងមួយ ដើម្បីបញ្ចប់សង្គ្រាម នៅ​តំបន់​មជ្ឈិមបូព៌ា លើគ្រប់សមរភូមិ ក្នុង​នោះ​រួមទាំងនៅ​ប្រទេសលីបង់ផង​ដែរ​ និងបើកច្រកសមុទ្រ Hormuz ឡើងវិញ ប៉ុន្តែបញ្ហា​ដ៏ស្មុគស្មាញនៃកម្មវិធីនុយក្លេអ៊ែររបស់ទីក្រុងតេអេរ៉ង់​ត្រូវបាន​ចង្អុលបង្ហាញ​តិច​តួច​ប៉ុណ្ណោះ​។ ប្រធានាធិបតីអាមេរិក លោក​ Donald Trump បានបញ្ជាក់​ថា ច្រកសមុទ្រ Hormuz នឹងត្រូវបាន​បើកឡើងវិញបន្ទាប់ពីការចុះហត្ថលេខាលើកិច្ចព្រមព្រៀងដែលត្រូវ​បានគ្រោងទុកនៅថ្ងៃសុក្រ ក្នុង​សប្ដាហ៍នេះ នៅ​ប្រទេស​ស្វីស​៕