អ្នកការទូតម្នាក់ បានប្រាប់សារព័ត៌មាន​ AFP នៅ​ថ្ងៃចន្ទ (ទី១៥ ខែមិថុនា ឆ្នាំ២០២៦)​ នេះ​ថា សហរដ្ឋអាមេរិក និងអ៊ីរ៉ង់ នឹងធ្វើកិច្ចប្រជុំដោយប្រយោល នៅទីក្រុងដូហា ប្រទេស​កាតា នាសប្តាហ៍នេះ មុនពេលឈាន​ដល់​ការ​ចុះហត្ថលេខាជាផ្លូវការ លើកិច្ចព្រមព្រៀងមួយដែលមានគោលបំណងបញ្ចប់សង្គ្រាម នៅតំបន់​មជ្ឈិមបូព៌ា។

ដោយនិយាយក្នុងលក្ខខណ្ឌមិនបញ្ចេញឈ្មោះ ដោយសារ​នេះ​ជា​កិច្ច​ពិភាក្សា​រៀបចំដ៏រសើប អ្នកការទូតរូបនេះ​ បានបញ្ជាក់ថា៖ «កិច្ចប្រជុំត្រៀមលក្ខណៈដាច់ដោយឡែកពីគ្នាជាមួយភាគីនីមួយៗ ឥឡូវនេះ នឹងធ្វើឡើងនៅទីក្រុងដូហា នា​សប្តាហ៍នេះ មុនពេលឈាន​ដល់​ការចុះហត្ថលេខាជាផ្លូវការ នៅប្រទេសស្វីស និងការចាប់ផ្តើមនៃកិច្ចពិភាក្សាបច្ចេកទេស»។

ប្រភពព័ត៌មានបានបន្ថែមថា អ្នកសម្របសម្រួលកាតា បានចាកចេញពីទីក្រុងតេអេរ៉ង់ បន្ទាប់ពីមាន​ «កិច្ច​ចរចាយ៉ាងតឹង​តែង​រយៈពេល ១៧ម៉ោង» ដែលបានចាប់ផ្តើមកាល​ពី​ថ្ងៃអាទិត្យ និងបានឈានដល់កិច្ចព្រមព្រៀងមួយ​។

សហរដ្ឋអាមេរិក និងអ៊ីរ៉ង់ បានឲ្យ​ដឹង​ថា ប្រទេស​ទាំង២ បានឈានដល់កិច្ចព្រមព្រៀងមួយ ដើម្បីបញ្ចប់សង្គ្រាម នៅ​តំបន់​មជ្ឈិមបូព៌ា លើគ្រប់សមរភូមិ រួមទាំងនៅ​ប្រទេសលីបង់ផង​ដែរ​ និងបើកច្រកសមុទ្រ Hormuz ឡើងវិញ ប៉ុន្តែបានផ្តល់ការចង្អុលបង្ហាញតិចតួច លើបញ្ហា​ដ៏ស្មុគស្មាញនៃកម្មវិធីនុយក្លេអ៊ែររបស់ទីក្រុងតេអេរ៉ង់។

ប្រទេស​ប៉ាគីស្ថាន បានប្រកាសដំបូង​ អំពីកិច្ចព្រមព្រៀងនេះ ដោយនាយករដ្ឋមន្ត្រី លោក​ Shehbaz Sharif បាននិយាយថា «ភាគីទាំង២ បានប្រកាសពីការបញ្ចប់ប្រតិបត្តិការយោធាជាបន្ទាន់ និងជាអចិន្ត្រៃយ៍ លើគ្រប់សមរភូមិ រួមទាំងនៅលីបង់ផងដែរ»។

ព័ត៌មានលម្អិតមួយចំនួនតូចត្រូវបានបង្ហាញជាសាធារណៈ ប៉ុន្តែប្រធានាធិបតីអាមេរិក លោក​ Donald Trump បាននិយាយថា ច្រកសមុទ្រ Hormuz ដែលជាច្រកដ៏​សំខាន់ សម្រាប់ការផ្គត់ផ្គង់ប្រេងសកល នឹងបើកឡើងវិញបន្ទាប់ពីការចុះហត្ថលេខាលើកិច្ចព្រមព្រៀងដែលត្រូវ​បានគ្រោងទុកនៅថ្ងៃសុក្រ ក្នុង​សប្ដាហ៍នេះ​៕