ទីភ្នាក់ងាររញ្ជួយដីរដ្ឋហ្វីលីពីន Phivolcs បានឲ្យ​ដឹង​ថា រញ្ជួយដីកម្រិត ៦,៦រ៉ិចទ័រ បានកើត​ឡើង​ នៅ​កោះ Mindanao នៅភាគខាងត្បូងនៃ​ប្រទេសហ្វីលីពីន នាថ្ងៃចន្ទ (ទី១៥ ខែមិថុនា ឆ្នាំ​២០២៦) នេះ។

ទីភ្នាក់ងាររញ្ជួយដីរដ្ឋហ្វីលីពីន Phivolcs បានបញ្ជាក់​ថា រញ្ជួយដីដែលបានវាយប្រហារចម្ងាយ ១៦៤គីឡូម៉ែត្រ នៅ​ភាគអាគ្នេយ៍តំបន់​​ Governor Generoso ក្នុងខេត្ត Davao Oriental មានជម្រៅ ៨៦គីឡូម៉ែត្រ ដោយបន្ថែមថា ការ​ខូចខាតមិន​ត្រូវបាន​រំពឹង​​ថា នឹង​មាន​នោះទេ។

នាយក Phivolcs លោក Teresito Bacolcol បានប្រាប់វិទ្យុ DZMM ថា រញ្ជួយដី នៅថ្ងៃទី១៥ ខែមិថុនានេះ​ មានប្រភពមកពីតាមបណ្តោយតំបន់​ Philippine Trench ហើយមិនមានទំនាក់ទំនងជាមួយនឹងរញ្ជួយដីកម្រិត ៧,៨រ៉ិចទ័រ ដែលបានវាយប្រហារកោះ Mindanao កាលពីថ្ងៃទី៨ ខែមិថុនានោះឡើយ​ ហើយ​ការ​រញ្ជួយ​នេះ​មានចំណុចកណ្តាល នៅចម្ងាយជាង ២៥០គីឡូម៉ែត្រ។

គួរបញ្ជាក់ដែរ​ថា ទីភ្នាក់ងារការពារជនស៊ីវិលរបស់ប្រទេសនេះ បានឲ្យ​ដឹង​ថា ចំនួនអ្នកស្លាប់ដោយសាររញ្ជួយដីដ៏ខ្លាំងក្លាកាលពីសប្តាហ៍មុន បានកើនឡើងដល់ ៦៥នាក់ហើយ​ ខណៈ​មនុស្ស ៣៦នាក់ទៀត​នៅតែបាត់ខ្លួនដដែល​៕