ប្រធានាធិបតីកូរ៉េខាងត្បូង លោក Lee Jae Myung បានអំពាវនាវដល់ក្រុមបាតុករដែលប្រមូលផ្តុំគ្នាតវ៉ា​ពាក់​ព័ន្ធ​នឹងការ​ខ្វះ​ខាត​សន្លឹកឆ្នោត អំឡុង​ពេល​មាន​ការបោះឆ្នោត​មូល​ដ្ឋាន​ កាល​ពីថ្ងៃទី៣ ខែមិថុនា ដើម្បីជៀសវាងការរំលោភលើសិទ្ធិរបស់អ្នកដទៃ។

នៅថ្ងៃចន្ទ (ទី១៥ ខែមិថុនា ឆ្នាំ២០២៦) នេះ លោក Lee បានសរសេរនៅលើវេទិកាបណ្ដាញ​សង្គម X ថា៖ «ក្រុមបាតុករគួរតែប្រុងប្រយ័ត្នកុំឲ្យ​ការបញ្ចេញមតិរបស់ពួកគេប៉ះពាល់​ដល់​សិទ្ធិរបស់អ្នកដទៃ»។

លោក Lee បានធ្វើការកត់សម្គាល់បែប​នេះ ខណៈពេលកំពុងចែករំលែករបាយការណ៍ព័ត៌មាន ក្នុងស្រុកមួយដែលបានឲ្យ​ដឹង​​ថា ស្ថាប័ន​កីឡាដែលមានការិយាល័យនៅខាងក្នុងឧទ្យានអូឡាំពិក (Olympic Park) នៅភាគខាងត្បូងនៃ​ទីក្រុងសេអ៊ូល បានរងការរំខានដល់ការងារ ដោយសារតែក្រុមបាតុកររារាំងការចូលទៅកាន់កន្លែងស្នាក់នៅ នៅទីនោះ។

យោងតាមរបាយការណ៍នេះ បាន​ឲ្យ​ដឹង​ទៀត​ថា​ ការរំខានទាំងនេះបានធ្វើឲ្យស្ថាប័ន​មួយចំនួនពិបាកអនុវត្តការងាររដ្ឋបាលដែលត្រូវការសម្រាប់អត្តពលិកកូរ៉េខាងត្បូង ដើម្បីចូលរួមក្នុងការប្រកួតអន្តរជាតិ។

គួរបញ្ជាក់​ថា ការតវ៉ាបានបន្តនៅជុំវិញទីលាន​កីឡាបាល់គប់​របស់ឧទ្យានអូឡាំពិក ដែលត្រូវបានប្រើជាមជ្ឈមណ្ឌលរាប់សន្លឹកឆ្នោត សម្រាប់ការបោះឆ្នោតមូលដ្ឋាន កាលពី​ថ្ងៃទី៣ ខែមិថុនា និងជាកន្លែងដែលប្រអប់សន្លឹកឆ្នោតត្រូវបានរក្សាទុក បន្ទាប់ពីការបោះឆ្នោតបាន​បញ្ចប់​។

លោក Lee បានបញ្ជាក់​ថា លោកបានណែនាំនគរបាល​ឲ្យ​ធ្វើការស៊ើបអង្កេតយ៉ាងតឹងរ៉ឹង មិនត្រឹមតែចំពោះអ្នកដែលរារាំងការងារដោយកម្លាំងប៉ុណ្ណោះទេ ក្នុង​នោះ​រួមទាំងការរារាំងជនស៊ីវិលមិនឲ្យ​ចូលទៅក្នុងកន្លែងធ្វើការ ប៉ុន្តែថែមទាំងចំពោះអ្នកដែលឃុបឃិតគ្នា ក្នុងទង្វើបែបនេះផងដែរ៕