ប្រទេសចិន នៅថ្ងៃចន្ទ (ទី១៥ ខែមិថុនា ឆ្នាំ២០២៦) នេះ បានបញ្ជាក់ជាថ្មីនូវការអំពាវនាវរបស់ខ្លួនឲ្យមាន​ការសន្ទនា និងការចរចា បន្ទាប់ពីរុស្ស៊ី និងអ៊ុយក្រែន បានវាយប្រហារគ្នា​ដោយមីស៊ីល និងយាន​ដ្ូន​ទ្រង់ទ្រាយធំ ពេញមួយយប់ ដែលបណ្តាលឲ្យ​មានអ្នកស្លាប់ និងរបួស ក៏ដូច​ជា​ការខូចខាតដល់ភាគីទាំង​២​។

ដោយ​ឆ្លើយតបទៅនឹងសំណួរពីទីភ្នាក់ងារសារព័ត៌មាន Ukrinform របស់អ៊ុយក្រែន អំពីការវាយប្រហាររបស់រុស្ស៊ី លើទីក្រុងគីវ រួមទាំងការខូចខាតដែលត្រូវ​បានរាយការណ៍ ចំពោះទីតាំង​សាសនាប្រវត្តិសាស្ត្រ​ Kyiv Pechersk Lavra នៅ​ទីក្រុងគី​វ អ្នកនាំពាក្យក្រសួងការបរទេសចិន លោក Lin Jian បាននិយាយថា ជំហររបស់ទីក្រុងប៉េកាំង នៅតែមិនផ្លាស់ប្តូរឡើយ​។

លោក Lin បានប្រាប់សន្និសីទសារព័ត៌មានប្រចាំថ្ងៃ​ថា «ជំហររបស់ប្រទេសចិន ជុំវិញ​វិបត្តិអ៊ុយក្រែន គឺមិន​ប្រែប្រួល​ និងច្បាស់លាស់។ ការសន្ទនា គឺជាមធ្យោបាយតែមួយគត់ដែលអាចសម្រេចបាន ជុំវិញ​វិបត្តិនេះ​»។

ការអត្ថាធិប្បាយទាំងនេះ បានកើតឡើងបន្ទាប់ពីរុស្ស៊ី និងអ៊ុយក្រែន បានរាយការណ៍ពីការវាយប្រហារដ៏​ធំពេញមួយយប់។ អភិបាលតំបន់​ លោក​ Dmitry Milyaev បាននិយាយថា ជនស៊ីវិល ៣នាក់ ត្រូវបានសម្លាប់ និង ៣នាក់ផ្សេងទៀតរងរបួស ក្នុង​នោះ​រួមមាន​ទាំងកុមារអាយុ ១ឆ្នាំម្នាក់ផង​ដែរ​ អំឡុង​ការវាយប្រហារដោយយានដ្រូន​របស់អ៊ុយក្រែន នៅ​តំបន់ Tula របស់រុស្ស៊ី។

ក្រសួងការពារជាតិរុស្ស៊ីបាន​ឲ្យ​ដឹង​ថា ប្រព័ន្ធ​ការពារដែនអាកាសរបស់ខ្លួន បានស្ទាក់ចាប់ និងបំផ្លាញយានដ្រូន​របស់អ៊ុយក្រែនចំនួន ១២៣គ្រឿង នៅទូទាំងតំបន់ជាច្រើន ដែល​រួមមាន​ Belgorod, Bryansk, Kursk, Rostov, Crimea និងតំបន់ Moscow។

ចំណែក​កងទ័ពអាកាសអ៊ុយក្រែន បានប្រាប់​ថា រុស្ស៊ីបានបាញ់មីស៊ីលជាង ៧០គ្រាប់ និងយានដ្រូន​ចំនួន ៦១១គ្រឿង នៅទូទាំងប្រទេស ក្នុង​នោះ​រួមទាំងមីស៊ីលជាង ៦០គ្រាប់ដែលកំណត់គោលដៅទីក្រុងគីវពេញមួយយប់ផង​ដែរ​។

អាជ្ញាធរអ៊ុយក្រែនបានរាយការណ៍ពីការខូចខាតដល់ទីតាំងស៊ីវិល និងវប្បធម៌ ក្នុង​នោះ​រួមទាំងបរិវេណទីតាំងសាសនា​ប្រវត្តិសាស្ត្រ Kyiv Pechersk Lavra ផង​ដែរ​៕