តម្លៃឧស្ម័នធម្មជាតិ នៅ​តំបន់អឺរ៉ុប បានធ្លាក់ចុះ ៦,២ភាគរយ នៅ​ថ្ងៃចន្ទ (ទី១៥ ខែមិថុនា ឆ្នាំ២០២៦) នេះ ដោយឈានដល់កម្រិត​ទាបបំផុតជាលើក​ដំបូង ក្នុងរយៈពេល ៥សប្តាហ៍ បន្ទាប់ពីសហរដ្ឋអាមេរិក និងអ៊ីរ៉ង់ បានឈានដល់កិច្ចព្រមព្រៀងក្របខ័ណ្ឌបឋមដែលមានគោលបំណងបញ្ចប់ជម្លោះរបស់ភាគីទាំង២ និងបើកច្រកសមុទ្រ Hormuz ឡើងវិញ ដោយជួយបន្ធូរបន្ថយក្ដី​បារម្ភ អំពីការរំខានដល់ការផ្គត់ផ្គង់ឧស្ម័នធម្មជាតិរាវ (LNG)។

កិច្ច​សន្យាអនាគតជិត​ផុត​កំណត់​​ ក្នុងប្រទេស​ហូឡង់ នៅឯ Title Transfer Facility (TTF) ដែលជាមជ្ឈមណ្ឌលជួញដូរឧស្ម័ន​ឈានមុខគេរបស់តំបន់​អឺរ៉ុប បានធ្លាក់ចុះមកត្រឹមប្រហែល ៤៣,៣អឺរ៉ូ (៥០,៩ដុល្លារ) ក្នុងមួយមេហ្គាវ៉ាត់ម៉ោង ក្នុងអំឡុងពេលជួញដូរ ខណៈដែលបុព្វលាភហានិភ័យភូមិសាស្ត្រនយោបាយ នៅក្នុងទីផ្សារថាមពល បានធ្លាក់ចុះ។

ការធ្លាក់ចុះនេះបានកើតឡើងបន្ទាប់ពីនាយករដ្ឋមន្ត្រីប៉ាគីស្ថាន លោក​ Shehbaz Sharif បានប្រកាសពីវឌ្ឍនភាព​ នៅ​ក្នុងកិច្ចប្រឹងប្រែង ដើម្បីបញ្ចប់ជម្លោះ ដោយនិយាយថា សហរដ្ឋអាមេរិក និងអ៊ីរ៉ង់ បានព្រមព្រៀងគ្នា ស្ដី​ពី​ក្របខ័ណ្ឌបឋម ដែលរួមមានការបញ្ចប់ប្រតិបត្តិការយោធាជាបន្ទាន់ និងជាអចិន្ត្រៃយ៍ លើគ្រប់សមរភូមិ រួមទាំងនៅលីបង់ផងដែរ។

កិច្ចព្រមព្រៀងនេះត្រូវបានគេរំពឹងថា នឹងត្រូវបានចុះហត្ថលេខាជាផ្លូវការនៅប្រទេសស្វីស នា​ថ្ងៃទី១៩​ ខែមិថុនា។ វាក៏រួមបញ្ចូលផង​ដែរ​ទាំងការលុប​ការបិទផ្លូវ​ទឹករបស់​សហរដ្ឋអាមេរិក ចំពោះ​កំពង់ផែអ៊ីរ៉ង់ និងការបើកច្រកសមុទ្រ Hormuz ឡើងវិញ ជាផ្លូវតូច​ចង្អៀត​​ដ៏សំខាន់មួយ​ សម្រាប់​​ថាមពល ដែលភ្ជាប់ឈូងសមុទ្រពែក្ស​ជាមួយនឹងផ្លូវដឹកជញ្ជូនសកល។

ច្រកសមុទ្រនេះមានសារៈសំខាន់ជាពិសេស សម្រាប់ LNG ដោយសារប្រហែល ១ភាគ៥ នៃការជួញដូរឧស្ម័នធម្មជាតិរាវទូទាំងពិភពលោក បានឆ្លងកាត់ផ្លូវនេះក្នុងឆ្នាំ២០២៤ ដែលភាគច្រើនមកពីប្រទេសកាតា​។ នេះបើយោងតាមរដ្ឋបាលព័ត៌មានថាមពលសហរដ្ឋអាមេរិក៕