នៅឯ​កិច្ចប្រជុំកំពូលនៃ​ប្រទេស​មាន​ឧស្សាហកម្ម​លូត​លាស់​ទាំង៧ (G7) នាថ្ងៃអង្គារ (ទី១៦ ខែមិថុនា ឆ្នាំ២០២៦) នេះ បណ្ដា​មេដឹកនាំ​អឺរ៉ុប នឹងប្រាប់​​​ប្រធានាធិបតីអាមេរិក លោក Donald Trump ថា កិច្ចព្រមព្រៀងបណ្តោះអាសន្នជាមួយ​អ៊ីរ៉ង់ដែលមានសភាពស្រពេចស្រពិល អាចធ្វើឲ្យ​កម្មវិធីនុយក្លេអ៊ែរ និងមីស៊ីលបាលីស្ទិក​របស់ទីក្រុងតេអេរ៉ង់កាន់តែរឹងមាំ ខណៈពេលដែលក៏ជំរុញផង​ដែរ​​ឲ្យ​រូប​លោក​គិត​គូឡើងវិញ អំពីយុទ្ធសាស្ត្ររបស់​លោក ចំពោះ​អ៊ុយក្រែន។

ការជួបប្រជុំ ចាប់ពីថ្ងៃទី១៥ ដល់ថ្ងៃទី១៧ ខែមិថុនា នៅរមណីដ្ឋាន​​ Evian-les-Bains (អេវីយ៉ង់ ឡេស៍ បាំងស៍​) ក្បែរ​បឹងហ្សឺណែវ (Lake Geneva) បាននាំ​ឲ្យ​មេដឹកនាំនៃប្រទេសបារាំង ចក្រភពអង់គ្លេស កាណាដា អាល្លឺម៉ង់ អ៊ីតាលី ជប៉ុន និងសហរដ្ឋអាមេរិកមក​អង្គុយ​ជុំ​គ្នា រួមជាមួយសហភាពអឺរ៉ុប (EU)។

លោក Trump បានទៅ​ប្រទេសបារាំងកាល​ពី​ល្ងាចថ្ងៃចន្ទ អម​ដោយ​ក្ដី​រីក​រាយ​ បន្ទាប់ពីទីក្រុងវ៉ាស៊ីនតោន និងតេអេរ៉ង់ បានយល់ព្រមលើកិច្ចព្រមព្រៀងបឋមមួយ ដើម្បីបញ្ចប់ជម្លោះកាន់តែរីក​រាល​ដាល​ ដោយ​ការចុះហត្ថលេខាជាផ្លូវការ គ្រោង​កើត​ឡើង​នៅ​ថ្ងៃសុក្រ។ ភ្លាមៗបន្ទាប់ពីលោកបាន​ទៅ​ដល់ទឹក​ដី​ Evian-les-Bains លោក Trump បាននិយាយ​ថា៖ «កិច្ចព្រមព្រៀងជាមួយ​អ៊ីរ៉ង់ នឹងនាំមកនូវភាពជោគជ័យជាច្រើន»។

កិច្ចព្រមព្រៀង​បណ្ដោះអាសន្ន​នេះ ​គួរ​តែ​បើកឱកាស​រយៈ​ពេល​ ៦០​ថ្ងៃ ​សម្រាប់​ការ​ចរចា​បច្ចេកទេស​ស្មុគស្មាញ​ដែល​នឹង​រួម​បញ្ចូល​ជោគវាសនា​នៃសារធាតុ​​អ៊ុយរ៉ានី​ញ៉ូមចម្រាញ់ហើយ​កម្រិតខ្ពស់​របស់​អ៊ីរ៉ង់ និង​ការ​លុប​ចោល​​ទណ្ឌកម្ម។ តែយ៉ាង​ណាក្ដី ​សម្ព័ន្ធមិត្ត​អឺរ៉ុបបារម្ភ​ថា ក្រុម​ចរចា​របស់​សហរដ្ឋអាមេរិក​ដែលមិន​សូវ​មាន​​បទពិសោធន៍​ អាច​នឹង​បរាជ័យ​ក្នុង​ការ​ធានា​ឲ្យមាន​​កិច្ចព្រមព្រៀង​នុយក្លេអ៊ែរ​ដ៏​រឹងមាំ ឬ​ដោះស្រាយ​កម្មវិធី​មីស៊ីល​បាលីស្ទិក​របស់​អ៊ីរ៉ង់ ​នៅ​ដំណាក់កាល​បន្ទាប់ ដែលនាំ​ឲ្យ​​ប្រឈម​នឹង​ការ​ជាប់​គាំង​យូរ។

ហើយ​ជាមួយ​គ្នានេះដែរ អ្នកការទូតអឺរ៉ុបក៏មើលឃើញថា កិច្ចប្រជុំកំពូលនេះ គឺ​ជាឱកាសមួយ ដែល​ត្រូវ​ប្រាប់​ទៅ​លោក Trump ថា សំណើរបស់សហរដ្ឋអាមេរិកកន្លងមក សម្រាប់កិច្ចព្រមព្រៀង ដើម្បីបញ្ចប់ការប្រយុទ្ធគ្នា នៅអ៊ុយក្រែន គឺផ្ដល់​ផល​ចំណេញ​ពេកដល់​ទីក្រុងមូស្គូ៕