សៀមរាប ៖ មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បានព្រមានចាត់វិធានការមិនទទួល ខុសត្រូវ អោយចូលអង្គភាព ចំពោះយោធិនណាមិនចូលរួមអនុវត្តការពារជំងឺកូវីដ-១៩ តាមបទបញ្ជា និងតាមការណែនាំ របស់រាជ រដ្ឋាភិបាល ក៏ដូចជាក្រសួងសុខាភិបាល តាមពាក្យស្លោក៣កុំ៣ការពារ ដើម្បីទប់ស្កាត់ការឆ្លងជំងឺកូវីដ១៩។ ការព្រមាន ក្រោយពេលយោធិនពីររូបនៅក្រសួងការពារជាតិ បានឆ្លងកូវីដ១៩ បើទោះបី ចាក់វ៉ាក់សាំងរួចក៏ដោយ។
លោកឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ លោក មានប្រសាសន៍នៅក្នុងពិធីបើកដំណើរការចាក់វ៉ាក់សាំងដូសទី២ ដល់កងកម្លាំងចម្រុះជាង២ម៉ឺននាក់ នៅយោធភូមិភាគទី៤ កាលពីថ្ងៃទី១៨ ខែមីនា ឆ្នាំ២០២១នេះថា មេបញ្ជាការនៅគ្រប់តាមបណ្ដាអង្គភាពទាំង អស់ដែលចំណុះអោយយោធភូមិភាគទី៤ ត្រូវណែនាំ ដល់យោធិនរបស់ខ្លួន អោយអនុវត្ត៣កុំ៣ការពារ តាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល អោយបានជាប់ជាប្រចាំ។ តាមអង្គភាពនីមួយៗត្រូវដាក់កន្លែងត្រួតពិនិត្យឆែកកំដៅ និងមានទឹកអាកុលសម្រាប់លាងដៃ ពាក់ម៉ាស់ ពេលចូលបំពេញការងារ ហើយហាមដាច់ខាតមិនអោយអនុញ្ញាតជនទាំងឡាយណាដែលមិនស្គាល់អត្តសញ្ញាណអោយចូលអង្គភាពនោះឡើយ ទោះបីគ្រួសារកងទ័ពក៏ដោយ។
លោកឧត្ដមសេនីយ៍ បានបន្ដថា កង កម្លាំងប្រដាប់អាវុធទាំងអស់ ពេលចេញពីអង្គភាពវិញ ហើយធ្វើដំណើរដោយម៉ូតូ ត្រូវពាក់ម៉ាស់អោយបានត្រឹមត្រូវជាប់ជាប្រចាំ ដោយព្រមានថា បើសិនមានបញ្ហាណាមួយកើតឡើង ឬសមត្ថកិច្ចឃាត់ខ្លួន អង្គភាពមិនទទួលខុសត្រូវនោះទេ ដោយលោកបញ្ជាក់ថា បុគ្គលមិនគោរពបទបញ្ជាទុកក៏មិនចំណេញដែរ។ ដោយឡែកចំពោះយោធិនដែលមកពីតាមខេត្ដផ្សេងៗ ឬ រាជធានីភ្នំពេញ ជាពិសេសខេត្ដជាប់ពាក់ព័ន្ធព្រឹត្តិការណ៍សហគមន៍២០កុម្ភៈ មុនអោយចូលក្នុងភូមិសាស្ដ្រដែលគ្រប់គ្រងដោយយោធភូមិភាគទី៤ ត្រូវអោយធ្វើចត្ដាឡីស័ក ១៤ថ្ងៃ ដើម្បីទប់ស្កាត់ ការឆ្លងជំងឺចូលក្នុងអង្គភាព។
លោកឧត្ដមសេនីយ៍ ពៅ ហេង បានបន្ដថា មន្ទីរពេទ្យយោធភូមិភាគទី៤ បានត្រៀមកន្លែងធ្វើចត្ដាឡីស័ក រួចរាល់ហើយ សម្រាប់ដាក់កងកម្លាំងប្រដាប់អាវុធទាំងអស់ដែលមានការជាប់ពាក់ព័ន្ធ នឹងព្រឹត្តិការណ៍សហគមន៍២០ កុម្ភៈ ព្រមទាំងចំពោះយោធិនណាដែលមកពីតាមបណ្ដាខេត្ដ ដែលឆ្លងកូវីដ១៩ផងដែរ។ លោក ក៏បានកោតសរសើរផងដែរ ចំពោះមេបញ្ជាការកងឯកភាពទាំងអស់ ដែលបានទប់ស្កាត់ក្នុងការការពារជំងឺកូវីដ១៩ បានល្អក្នុងនៅក្នុងអង្គភាព ។
នាឱកាសនោះដែរ លោកឧត្ដម ក៏បានរំលឹកដល់កងកម្លាំងប្រដាប់អាវុធអោយចាក់ថ្នាំវ៉ាក់សាំងដូសទី២ ហើយត្រូវអនុវត្តតាមការណែនាំ ពីក្រុមគ្រូពេទ្យផងដែរ ៕
អត្ថបទ ៖ ឈិត សាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
