សហរដ្ឋអាមេរិក នឹងបង្កើត​ជា​គំរូមួយ ដោយធ្វើជាម្ចាស់ផ្ទះ សម្រាប់ការប្រកួតបាល់​ទាត់​ពិភលោក​ ឆ្នាំ២០២៦ (FIFA World Cup 2026) របស់ក្រុម​ជម្រើសជាតិ​អ៊ីរ៉ង់ ជាប្រទេសដែលមាន​សង្គ្រាមជាមួយគ្នា​ ឬទើបតែបញ្ចប់​ជម្លោះ​ជាមួយ​គ្នា​ បន្ទាប់ពីមេដឹកនាំប្រទេសទាំង ២ បានប្រកាសកាលពីថ្ងៃចន្ទ (ទី១៥ ខែមិថុនា ឆ្នាំ២០២៦) ថា បាន​ឈានដល់កិច្ចព្រមព្រៀងហើយ​ ដើម្បីបញ្ចប់ជម្លោះដែលបានចាប់ផ្តើមកាល​ចុងខែកុម្ភៈ។

ស្ថានភាពមិនដែល​មាន​​នេះ នឹងកើតឡើងនៅក្នុងព្រឹត្តិការណ៍ World Cup ឆ្នាំ២០២៦ ដែល​នោះ គឺថា ​មិនធ្លាប់មានប្រទេសម្ចាស់ផ្ទះណាមួយ ស្ថិតក្នុងស្ថានភាពមាន​សង្គ្រាមយ៉ាង​សកម្ម ឬទើបតែបញ្ចប់​ជម្លោះ​ជាមួយប្រទេសមួយផ្សេងទៀតចូលរួមក្នុងការប្រកួតនោះទេ។

សហរដ្ឋអាមេរិក ដែលម្ចាស់ផ្ទះរួម​ ជាមួយកាណាដា និងម៉ិកស៊ិក បានមាន​សង្គ្រាម រហូតដល់ពេល​ថ្មីៗនេះជាមួយអ៊ីរ៉ង់ ដែលត្រូវ​​ប្រកួតប្រជែងក្នុងព្រឹត្តិការណ៍ដ៏​ធំ​របស់​ពិភពលោកផ្នែកកីឡាបាល់ទាត់នេះ​។

ទី​កន្លែងកីឡាមួយ នៅក្នុងរដ្ឋ Arizona របស់សហរដ្ឋអាមេរិក បាន​បើកទ្វាររង់ចាំទទួល​ក្រុមបាល់ទាត់អ៊ីរ៉ង់ មុនព្រឹត្តិការណ៍ World Cup ចាប់​ផ្ដើម​។ ប៉ុន្តែកន្លែងហ្វឹកហាត់របស់ក្រុមនេះ ត្រូវបានផ្លាស់ពីសហរដ្ឋអាមេរិកទៅម៉ិកស៊ិកវិញ។ អ៊ីរ៉ង់ ស្ថិត​នៅក្នុងពូល G ដោយ​ត្រូវ​ប្រឈម​ជាមួយនូវែលសេឡង់ បែលហ្ស៊ិក និងអេហ្ស៊ីប​។

ប្រសិនបើសង្គ្រាមជាមួយអ៊ីរ៉ង់មិនបញ្ចប់ទេនោះ​ ក្តីបារម្ភអំពីសន្តិសុខ អាចនឹងកើតឡើង ក្នុងអំឡុងពេលមាន​ការប្រកួតរបស់អ៊ីរ៉ង់ នៅសហរដ្ឋអាមេរិក។ ដោយសារជម្លោះ នៅ​ក្នុងសង្គ្រាម រវាងសហរដ្ឋអាមេរិក និងអ៊ីរ៉ង់ គឺស្ថិតនៅក្នុងរង្វង់​តំបន់របស់​ប្រទេស​អ៊ីរ៉ង់ និងមជ្ឈិមបូព៌ា ការលុបចោលការប្រកួត នៅអាមេរិកខាងជើងនេះ​ មិនត្រូវបានពិចារណានោះឡើយ៕