នៅទីក្រុងប៉េកាំង នា​ថ្ងៃអង្គារ (ទី១៦ ខែមិថុនា ឆ្នាំ២០២៦) នេះ ប្រធានាធិបតីចិន លោក Xi Jinping បានប្រាប់មេដឹកនាំមីយ៉ាន់ម៉ាថា ប្រទេសអាស៊ីអាគ្នេយ៍មួយ​នេះ គួរតែ «រិះរកមាញគ៌ាអភិវឌ្ឍន៍ដ៏​ត្រឹមត្រូវ» ដែល «ទទួលបានការគាំទ្រពីប្រជាជន»។ នេះបើយោងតាមសារព័ត៌មានគ្រប់គ្រងដោយរដ្ឋ Xinhua។

លោកប្រធានាធិបតី Xi បានធ្វើជាម្ចាស់ផ្ទះ​ទទួលសមភាគីរបស់លោក គឺ​លោក​ Min Aung Hlaing បន្ទាប់ពីបានធ្វើពិធីស្វាគមន៍ជាផ្លូវការ សម្រាប់មេដឹកនាំ នៅទីក្រុងប៉េកាំង។

លោក ស៊ី បានប្រាប់មេដឹកនាំ​របស់​សហភាព​មីយ៉ាន់ម៉ាថា៖ «ប្រទេសចិនយក​ទំនាក់ទំនងជាមួយមីយ៉ាន់ម៉ាជាអាទិភាព ក្នុងការទូតជិតខាង ហើយគាំទ្ររដ្ឋាភិបាលថ្មីរបស់សហភាព​មីយ៉ាន់ម៉ា ក្នុងការសម្របសម្រួលការអភិវឌ្ឍ និងសន្តិសុខ ដើម្បីរិះរកមាគ៌ា​អភិវឌ្ឍន៍ដ៏ត្រឹមត្រូវ ដែលសមស្របនឹងលក្ខខណ្ឌជាតិ​របស់ខ្លួន និងទទួលបានការគាំទ្រពីប្រជាជន»។

លោក Xi ក៏បានបញ្ជាក់​ផងដែរថា ច្រករបៀងសេដ្ឋកិច្ចចិន-មីយ៉ាន់ម៉ា នៅតែជាគម្រោងសំខាន់មួយ ក្រោមគំនិតផ្តួចផ្តើមខ្សែក្រវាត់​ និងផ្លូវ។ ហើយ​មេដឹកនាំទាំង​២ បានពិភាក្សាអំពីការជំរុញគម្រោងហេដ្ឋារចនាសម្ព័ន្ធសំខាន់ៗ ខណៈពេលដែលធានាសុវត្ថិភាព និងស្ថិរភាព។

លោក Xi បានសង្កត់ធ្ងន់​ថា គម្រោងបែបនេះគួរតែជួយលើកកម្ពស់​សេដ្ឋកិច្ច និងជីវភាពរស់នៅរបស់ប្រជាជនមីយ៉ាន់ម៉ា។ ហើយ​លោកបានបន្ថែមថា ប្រទេសចិនគាំទ្រយ៉ាងមុតមាំ ចំពោះប្រទេសមីយ៉ាន់ម៉ា ក្នុងការការពារអធិបតេយ្យភាព និងបូរណភាពទឹកដីរបស់ខ្លួន។

លោក Min បានទៅ​ដល់ប្រទេសចិន កាលពី​ថ្ងៃចន្ទ សម្រាប់ទស្សនកិច្ចរយៈពេល ៥ថ្ងៃ តាមការអញ្ជើញរបស់លោក Xi ដែលជាដំណើរលើកដំបូងរបស់លោកមកកាន់ប្រទេសនេះ ចាប់តាំងពីត្រូវបានជ្រើសរើស​ឲ្យ​កាន់​តំណែង​ជាប្រធានាធិបតីស៊ីវិល។ លោកត្រូវបានបោះឆ្នោត​ជ្រើសរើស​ នៅក្នុងខែមេសា បន្ទាប់ពីបានគ្រប់គ្រងប្រទេស ក្នុង​នាម​ជាប្រមុខយោធាអស់រយៈពេលជាច្រើនឆ្នាំ៕