រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយនៅ​ថ្ងៃអង្គារ (ទី១៦ ខែមិថុនា ឆ្នាំ២០២៦)​នេះ​ថា ការបញ្ចប់សង្គ្រាម នៅគ្រប់សមរភូមិ រួមទាំងការបញ្ឈប់ការវាយប្រហាររបស់អ៊ីស្រាអែល នៅប្រទេស​លីបង់ផងដែរ​ គឺជា «បុរេលក្ខខណ្ឌ» ដើម្បី​បញ្ចប់សង្គ្រាម រវាងអ៊ីរ៉ង់ និងសហរដ្ឋអាមេរិក-អ៊ីស្រាអែល​។ នេះបើយោងតាមទីភ្នាក់ងារសារព័ត៌មានរដ្ឋអ៊ីរ៉ង់ IRNA។

លោក Araghchi បានប្រាប់ការជួបជុំនៃបេសកកម្មអន្តរជាតិ នៅរដ្ឋធានីតេអេរ៉ង់ថា រណសិរ្ស នៅ​លីបង់ និងអ៊ីរ៉ង់ «បានក្លាយជាទំនាក់ទំនង និងពឹងផ្អែកលើគ្នាទៅវិញទៅមក ចាប់តាំងពីថ្ងៃដំបូង ដែល​សាធារណរដ្ឋឥស្លាមអ៊ីរ៉ង់ បានចាត់ទុកការបញ្ចប់សង្គ្រាមនៅលីបង់ ជាបុរេលក្ខខណ្ឌ សម្រាប់ការបញ្ចប់សង្គ្រាមជាមួយអ៊ីរ៉ង់»។

ដោយហៅបទឈប់បាញ់នៅលីបង់ថា ជាផ្នែកមួយ «មិនអាចផ្ដាច់ចេញ​បាន» នៃកិច្ចព្រមព្រៀង ដែលបានប្រកាសថ្មីៗនេះជាមួយសហរដ្ឋអាមេរិក លោកបាននិយាយ​ថា៖ «ចាប់តាំង​ពីយើងបានឈានដល់ការ​បញ្ចប់សង្គ្រាម ការ​បញ្ចប់សង្គ្រាមក៏នឹងមាន​នៅលីបង់ផងដែរ»។

គួរបញ្ជាក់ថា អ្នកការទូតជាន់ខ្ពស់​រូបនេះ បាននិយាយថា ការបញ្ចប់សង្គ្រាម ត្រូវបានប្រកាសកាល​ពី​ព្រឹកថ្ងៃចន្ទ តាម​ពេលវេលា​នៅប្រទេស​អ៊ីរ៉ង់ ដោយបន្ថែមថា អនុស្សរណៈនៃការយោគយល់គ្នា នឹងចូលជាធរមានជាផ្លូវការ នៅថ្ងៃសុក្រ។ ហើយបើយោង​តាម​ទីភ្នាក់ងារសារព័ត៌មាន​ពាក់កណ្ដាល​ផ្លូវការ Tasnim របស់អ៊ីរ៉ង់ បាន​ឲ្យ​ដឹង​​លោក Araghchi បានបញ្ជាក់​​ថា កិច្ចចរចា រវាងសហរដ្ឋអាមេរិក និងអ៊ីរ៉ង់ ដែលនឹងចាប់ផ្តើមនៅប្រទេសស្វីស នា​ថ្ងៃសុក្រនេះ នឹងត្រូវបានបែងចែកជា ២ដំណាក់កាល៕