រដ្ឋ Florida របស់សហរដ្ឋអាមេរិក បានប្រកាសកាលពី​ថ្ងៃចន្ទ (ទី១៥ ខែមិថុនា ឆ្នាំ២០២៦) ថា ខ្លួនបានដាក់ពាក្យបណ្តឹងប្ដឹង​បណ្ដាញ​សង្គម TikTok ដោយចោទប្រកាន់វេទិកាបង្ហោះ​វីដេអូខ្លីនេះថា បានរំលោភលើច្បាប់របស់​រដ្ឋនេះ ដែលកម្រិត​ការចូលប្រើបណ្ដាញ​សង្គម សម្រាប់កុមារ។

ការិយាល័យរបស់រដ្ឋមន្ត្រី​យុត្តិធម៌របស់​រដ្ឋ​នេះ​ បានឲ្យ​ដឹងនៅក្នុងសេចក្តីថ្លែងការណ៍មួយថា​ ក្នុងសន្និសីទសារព័ត៌មានមួយ ​ លោក​ James Uthmeier បានប្តឹងបណ្ដាញសង្គម TikTok ដោយចោទប្រកាន់ថា ក្រុមហ៊ុនបណ្ដាញ​សង្គមមួយនេះ បានប្រព្រឹត្ត «ការរំលោភបំពានជាបន្តបន្ទាប់លើ​ច្បាប់របស់​រដ្ឋ Florida ដោយផ្ដោត និងចុះកិច្ចសន្យាជាមួយអនីតិជន ខណៈពេលដែលបញ្ឆោតឪពុកម្តាយរបស់ក្មេងៗ អំពីគ្រោះថ្នាក់នៃកម្មវិធីនេះ​»។

លោក Uthmeier បាននិយាយថា៖ «ភាពជោគជ័យរបស់ TikTok អាស្រ័យលើសមត្ថភាពរបស់ខ្លួន ក្នុងការធ្វើឲ្យ​កុមារ និងក្មេងជំទង់ញៀន​ប្រើប្រាស់​វេទិកានេះ។ TikTok បញ្ឆោតឪពុកម្តាយដោយចេតនា និងបណ្ដោយ​ឲ្យ​កុមារប៉ះពាល់នឹងខ្លឹមសារគ្រោះថ្នាក់ និងមិនសមរម្យ ដែលជាការរំលោភដោយផ្ទាល់លើច្បាប់របស់​រដ្ឋ Florida។ យើងមិនអត់ឱន ចំពោះក្រុមហ៊ុនដែលផ្តល់អាទិភាពដល់ប្រាក់ចំណេញ ជាងសុវត្ថិភាពរបស់កុមារនោះ​ទេ។ TikTok អាច​នឹង​​ត្រូវទទួលខុសត្រូវ ចំពោះ​សកម្មភាព​របស់ខ្លួន​»។

គួរបញ្ជាក់ថា រដ្ឋ Florida បានអនុម័តច្បាប់ប្រចាំ​រដ្ឋនេះ ក្នុងឆ្នាំ២០២៥ ដែលហាមឃាត់កុមារអាយុក្រោម ១៤ឆ្នាំ មិន​ឲ្យ​ប្រើប្រាស់វេទិកាបណ្ដាញ​សង្គម ហើយ​តម្រូវឲ្យ​ក្មេងអាយុ ១៥ និង ១៦ឆ្នាំ ត្រូវ​មានការអនុញ្ញាតពីឪពុកម្តាយសិន មុនពេលបង្កើតគណនី៕