មន្ត្រីកាកបាទក្រហមមួយ​រូប​ នៅថ្ងៃអង្គារ (ទី១៦ ខែមិថុនា ឆ្នាំ២០២៦) បាន​ប្រាប់​ថា ការរាតត្បាតរបស់​ជំងឺ Ebola នៅភាគខាងកើតសាធារណរដ្ឋប្រជាធិបតេយ្យកុងហ្គោ មិនទាន់ឈានដល់កម្រិតខ្ពស់​បំផុត នៅឡើយទេ ហើយអាចមានរយៈពេល ១ឆ្នាំ។

ការ​ឆ្លង​ជាង ៨០០ករណី​នៃវីរុស​ដ៏កម្រប្រភេទ Bundibugyo ដែលមិនមានការព្យាបាល ឬវ៉ាក់សាំងបង្ការដែលមាន​ប្រសិទ្ធភាព​​ ត្រូវបានរាយការណ៍នៅក្នុងប្រទេសកុងហ្គោ ក្នុងនោះស្លាប់​ ១៩២ករណី។ ទិន្នន័យរបស់រដ្ឋាភិបាលបង្ហាញថា ជំងឺនេះ ដែលឆ្លងតាមរយៈសារធាតុរាវ ក្នុងខ្លួន សូម្បីតែក្រោយពេលស្លាប់ កំពុងរីករាលដាលយ៉ាងឆាប់រហ័ស នៅទូទាំងខេត្តចំនួន៣។

អ្នកគ្រប់គ្រងប្រតិបត្តិការ សម្រាប់សហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម (IFRC) លោក Bruno Michon បានប្រាប់អ្នកសារព័ត៌មានតាមរយៈតំណភ្ជាប់វីដេអូពីភាគខាងកើតនៃ​ប្រទេសកុងហ្គោថា៖ «វាគឺ​ពិបាកដឹងឲ្យបាន​ច្បាស់លាស់​ណាស់​ថា តើ​ការរាតត្បាតនេះ កំពុងរីករាលដាលដល់កម្រិតណា ប៉ុន្តែមែន​ហើយ​ ខ្ញុំគិតដា កម្រិតខ្ពស់​បំផុត គឺមិនទាន់ហួស​ពី​សមត្ថភាព​របស់​យើងទេ ប៉ុន្តែ​យើងនៅ​អាចទប់ទល់​បាន​។ យើងបារម្ភ​ថា អាចមានរយៈពេល ១ឆ្នាំ ដើម្បីលុប​បំបាត់​ជំងឺនេះ»។

យ៉ាង​ណាក្ដី ការឆ្លើយតបចំពោះជំងឺ​នេះ ត្រូវបានរារាំងដោយកង្វះមជ្ឈមណ្ឌលព្យាបាល និងការរឹង​រូស​​របស់សហគមន៍ ចំពោះវិធានការអនាម័យយ៉ាងតឹងរ៉ឹង ហើយមន្ត្រីសុខាភិបាល និយាយថា ជាងមួយខែចាប់តាំងពីការផ្ទុះឡើងនៃជំងឺនេះ ត្រូវបានប្រកាស ទំហំពិតប្រាកដនៅតែមិនទាន់ដឹងនៅឡើយទេ៕