ប្រភពការទូតពី​បារាំងមួយរូប បាននិយាយថា បណ្ដាប្រទេស​មាន​ឥទ្ធិពល​ឈានមុខគេទាំង៧ ឬ G7 បានយល់ព្រមបង្កើនសម្ពាធ លើរុស្ស៊ី ដើម្បី​ឲ្យ​បញ្ចប់សង្គ្រាមរបស់ខ្លួន លើអ៊ុយក្រែន តាមរយៈការ​ដាក់​ទណ្ឌកម្មថាមពលបន្ថែមទៀត។

បន្ទាប់ពីកិច្ចពិភាក្សា​ នៅឯកិច្ចប្រជុំកំពូល G7 ក្នុងទីក្រុង Evian-les-Bains របស់បារាំង ប្រភពនេះបាននិយាយថា៖ «មេដឹកនាំ​ទាំង​អស់​បានសម្រេចនៅថ្ងៃនេះ បង្កើនសម្ពាធលើរុស្ស៊ី តាមរយៈការ​ដាក់​ទណ្ឌកម្មលើឧស្ម័ន និងប្រេង»។

នៅ​មុននេះ ប្រធានាធិបតីអាមេរិក លោក Donald Trump បាននិយាយថា រុស្ស៊ីគួរតែធ្វើកិច្ចព្រមព្រៀងសន្តិភាពជាមួយអ៊ុយក្រែន ដោយបន្ថែមថា លោកនឹងធ្វើអ្វីដែលលោកអាចធ្វើបាន ដើម្បីបញ្ចប់សង្គ្រាមនេះ ​បន្ទាប់ពីមាន​នូវ​កិច្ចប្រជុំ «ដ៏​ល្អ» រវាងប្រធានាធិបតី លោក Volodymyr Zelensky និងមេដឹកនាំ G7។ លោក Trump បាននិយាយថា៖ «ខ្ញុំនឹងធ្វើអ្វីគ្រប់យ៉ាងដែលខ្ញុំអាចធ្វើបាន»។

លោក Zelensky និងអ្នកការទូតអឺរ៉ុប សង្ឃឹមថា នឹងធ្វើឲ្យ​លោក Trump ចាប់អារម្មណ៍ថា ស្ថានភាព​របស់អ៊ុយក្រែន បានប្រសើរឡើង ខណៈដែលទីក្រុងគីវ ជំរុញឲ្យ​មានការគាំទ្របន្ថែមទៀត ដើម្បីពង្រឹងការ​មាន​ប្រៀប​របស់ខ្លួន នៅក្នុងកិច្ចចរចាសន្តិភាពជាមួយទីក្រុងមូស្គូ៕