ប្រធានាធិបតីអាមេរិក លោក Donald Trump បាននិយាយនៅថ្ងៃអង្គារ (ទី១៦ ខែមិថុនា ឆ្នាំ២០២៦) នេះ​ថា នាយករដ្ឋមន្ត្រីអ៊ីស្រាអែល លោក Benjamin Netanyahu ត្រូវតែ «ទទួលខុសត្រូវបន្ថែមទៀត» លើប្រទេសលីបង់ ខណៈពេលដែលរិះគន់ទំហំនៃប្រតិបត្តិការយោធារបស់អ៊ីស្រាអែល ប្រឆាំងនឹងក្រុម​ហេសបូ​ឡារបស់លីបង់។

អំឡុង​ពេល​ថ្លែងទៅកាន់អ្នកសារ​ព័ត៌មាន នៅប្រទេសបារាំង លោក Trump បាននិយាយថា៖ «ខ្ញុំមានទំនាក់ទំនងដ៏អស្ចារ្យជាមួយ Bibi (លោក Netanyahu) ប៉ុន្តែឥឡូវនេះ Bibi ត្រូវតែទទួលខុសត្រូវបន្ថែមទៀត ទាក់ទងនឹងប្រទេសលីបង់»។

នៅប្រទេសបារាំង ជាកន្លែងដែលលោកកំពុងចូលរួមកិច្ចប្រជុំនៃ​ក្រុម​ប្រទេស​មាន​ឧស្សាហកម្ម​លូរលាស់​ទាំង២ (G7) លោកបានបញ្ជាក់​ថា៖ «ខ្ញុំចង់និយាយថា ក្នុងចំណោមប្រទេសទាំងអស់ ប្រទេស​លីបង់​ត្រូវបានគេប្រព្រឹត្តដាក់​អាក្រក់បំផុត ហើយប្រទេស​នេះ​មិនអាចការពារខ្លួនឯងបានទេ ហើយពួកគេមានក្រុម​ហេសបូឡាដែលជាបញ្ហាសម្រាប់ពួកគេ ដូច្នេះ ខ្ញុំមិនសប្បាយចិត្តនឹងរបៀបដែលអ៊ីស្រាអែល បានដោះស្រាយដោយ​ខ្លួនឯង ជាមួយប្រទេសលីបង់ និងជាមួយក្រុម​ហេសបូឡា​ទេ»។

ជាមួយ​គ្នា​នេះ លោក Trump ក៏បានគូសបញ្ជាក់ពីការគាំទ្ររបស់សហរដ្ឋអាមេរិក ចំពោះអ៊ីស្រាអែលផងដែរ ដោយនិយាយថា «បើគ្មានសហរដ្ឋអាមេរិកទេ នឹងគ្មានអ៊ីស្រាអែលឡើយ​» ដោយបាន​អះអាង​បន្ថែមថា៖ «អ៊ីស្រាអែល នឹងត្រូវបានបំផ្លាញ​ជាយូរមកហើយ ប្រសិនបើខ្ញុំមិនបានចូលរួម។ បើគ្មានខ្ញុំទេ នោះនឹងគ្មានអ៊ីស្រាអែលទេ ពីព្រោះគ្មានប្រធានាធិបតីណាម្នាក់មានឆន្ទៈធ្វើអ្វីដែលខ្ញុំបានធ្វើ»។

ដោយសំដៅទៅលើផលប៉ះពាល់ លើជនស៊ីវិល ដោយសារ​ការវាយប្រហាររបស់អ៊ីស្រាអែល នៅ​លីបង់ លោកបានសង្កត់ធ្ងន់​ថា៖ «អ្នកមិនចាំបាច់វាយកម្ទេចអគារលំនៅឋាន រាល់ពេលដែលអ្នកកំពុងស្វែងរកនរណាម្នាក់ទេ ព្រោះមានមនុស្សច្រើននៅក្នុងអគាលំនៅឋាន​ទាំងនោះ ហើយមិនមែនពួកគេ​ទាំងអស់សុទ្ធតែជាសមាជិក​របស់​ក្រុម​ហេសបូឡាឡើយ​»៕