រដ្ឋមន្ត្រីការបរទេសទួរគី បាននិយាយនៅថ្ងៃអង្គារ (ទី១៦ ខែមិថុនា ឆ្នាំ២០២៦) នេះ​ថា លោកបានប្រាប់សមភាគីរុស្ស៊ីរបស់លោក អំពីតម្រូវការ ក្នុងការបញ្ចៀសវិធានការ ​នៅក្នុងសមុទ្រខ្មៅ ដែលគំរាមកំហែងដល់សន្តិសុខ ក្នុងតំបន់ និងផលប្រយោជន៍របស់ទួរគី ដោយបន្ថែមថា លោកក៏បានលើក​ឡើង​ម្តងទៀតផង​ដែរ អំពីការស្នើរបស់​ទួរគី ក្នុងការសម្របសម្រួល រវាងទីក្រុងគីវ និងមូស្គូ។

ក្នុងរយៈពេលប៉ុន្មានខែថ្មីៗនេះ អ៊ុយក្រែន និងរុស្ស៊ី បានចោទប្រកាន់គ្នាទៅវិញទៅមក អំពីការវាយប្រហារដោយយាន​ដ្រូនលើនាវាដឹកប្រេងនៅជិតឆ្នេរសមុទ្រភាគខាងជើងរបស់​ទួរគី រួមទាំងការ​វាយ​ប្រហារ​មួយ លើនាវាជា​កម្មសិទ្ធិ​របស់​ទួរគីផង​ដែរ។ ទីក្រុង Ankara បានដាក់ការ​តវ៉ាទៅកាន់ទីក្រុងគីវ និងមូស្គូ ជុំវិញករណី​នេះ។

អំឡុង​ពេល​ថ្លែងនៅឯ​សន្និសីទសារព័ត៌មានមួយជាមួយរដ្ឋមន្ត្រីការបរទេសរុស្ស៊ី លោក Sergei Lavrov នៅទីក្រុងមូស្គូ រដ្ឋមន្ត្រីការបរទេសទួរគី លោក Hakan Fidan បាននិយាយថា អាទិភាព សម្រាប់ទួរគី ដែលបានរៀបចំកិច្ចចរចាដោយផ្ទាល់ជុំមុនៗ រវាងអ៊ុយក្រែន និងរុស្ស៊ី គឺធ្វើ​យ៉ាង​ណា​ឲ្យ​ភាគីទាំង២ ចាប់​ផ្ដើម​ការចរចាឡើង​វិញ​ និងបញ្ចប់សង្គ្រាមឲ្យ​បានឆាប់តាមដែលអាចធ្វើទៅបាន។

លោកបានបន្ត​ថា៖ «ខ្ញុំបានបង្ហាញពីការត្រៀមខ្លួនរបស់យើង ក្នុងការធ្វើជាម្ចាស់ផ្ទះនៃកិច្ចចរចាជុំបន្ទាប់ម្តងទៀត ។ ប្រសិនបើភាគីទាំង២ យល់ព្រម យើងក៏ត្រៀមខ្លួនរួចជាស្រេចហើយ​ដែរ ដើម្បីពិភាក្សាអំពីរបៀបដែលការចរចាអាចបន្តតាមរបៀបដែលផ្តោតលើលទ្ធផលកាន់តែច្រើនបន្ថែម​ទៀត​»។

លោក Fidan បានបន្ថែមថា៖ «ខ្ញុំបានជម្រាបជូនសមភាគីរបស់ខ្ញុំ អំពីការរំពឹងទុករបស់យើង ក្នុងការជៀសវាងកុំ​ឲ្យ​មាន​ឧប្បត្តិហេតុណាមួយដែលអាចប៉ះពាល់ដល់ផលប្រយោជន៍របស់ប្រទេសយើង នៅក្នុងសមុទ្រខ្មៅ»៕