មន្ត្រី និងរដ្ឋអាជ្ញាបាននិយាយកាលពីល្ងាចថ្ងៃអង្គារថា ការវាយប្រហាររបស់រុស្ស៊ីលើទីក្រុងនានា នៅភាគខាងកើត និងភាគអាគ្នេយ៍របស់អ៊ុយក្រែន បានសម្លាប់មនុស្ស ៤នាក់ និងបានបង្កឲ្យអគ្គិភ័យឆេះលំនៅឋានមួយ និងមជ្ឈមណ្ឌលផ្សារទំនើបមួយ។

រដ្ឋអាជ្ញានៅតំបន់ Donetsk ដែលជាចំណុចកណ្តាលនៃខ្សែបន្ទាត់ជួរមុខរបស់អ៊ុយក្រែន បាននិយាយថា មនុស្សបីនាក់ បានស្លាប់ ក្នុងការវាយប្រហារដោយគ្រាប់បែកពីរលើក នៅក្នុងទីក្រុង Sloviansk។ មនុស្ស ៥នាក់ បានរងរបួស។

ទីក្រុង Sloviansk គឺជាផ្នែកមួយនៃ «ខ្សែក្រវាត់បន្ទាយ» របស់ប្រទេស ដែលត្រូវបានការពារយ៉ាងខ្លាំងដោយយោធា និងត្រូវបានគេមើលឃើញថា ជាគន្លឹះក្នុងការទប់ស្កាត់ការវាយលុករបស់រុស្ស៊ីដែលមានចលនាយឺតៗ នៅក្នុងទីក្រុង Donetsk។

នៅក្នុងទីក្រុង Zaporizhzhia ភាគអាគ្នេយ៍នៃប្រទេសអ៊ុយក្រែន នគរបាលជាតិបាននិយាយថា រលកនៃការវាយប្រហារដោយយានដ្រូនរាប់សិបគ្រឿង បានសម្លាប់មនុស្សម្នាក់ នៅក្នុងរថយន្តរបស់ខ្លួន និង មនុស្ស ៧នាក់ ផ្សេងទៀត បានរងរបួស។

រូបភាពដែលបានបង្ហោះតាមអ៊ីនធឺណិត បង្ហាញពីអណ្តាតភ្លើងយ៉ាងសន្ធោសន្ធៅនៅក្នុងអគារមួយ និងនៅលើដំបូល ហើយផ្នែកខាងមុខ ត្រូវខូចខាតទាំងស្រុង៕