កិច្ចប្រជុំពាក់ព័ន្ធ ដែលបានធ្វើឡើងនៅក្នុងមហាសន្និបាតកាយឫទ្ធិនារីពិភពលោក លើកទី៣៩ បានចាប់ផ្ដើមដំណើរការហើយ ដោយផ្ដោតសំខាន់លើការជំរុញការផ្ដល់អំណាចដល់កុមារី និងយុវតី ដែលក្នុងនោះ ក៏មានកុមារី និងយុវតីកម្ពុជាផងដែរ។

នៅក្នុងពេលដឹកនាំចូលរួមកិច្ចប្រជុំពាក់ព័ន្ធ ក្នុងមហាសន្និបាតកាយឫទ្ធិនារីពិភពលោក លើកទី៣៩ នៅថ្ងៃទី១៧ ខែមិថុនា នេះ លោកជំទាវ ជឺ ដារី ប្រធានគណៈប្រតិភូ តំណាងសមាគមកាយឫទ្ធិនារីកម្ពុជា បានបញ្ជាក់ថា ក្នុងមហាសន្និបាតនេះ គឺមានកិច្ចប្រជុំដំណើរការជាហូរហែរ ដែលមានចែកចេញជា ៥តំបន់ ខណៈកម្ពុជាស្ថិតនៅក្នុងតំបន់អាស៊ីប៉ាស៊ីហ្វិក ដែលមានប្រធានបទពាក់ព័ន្ធនឹងភាពដឹកនាំរបស់យុវតី។ កិច្ចប្រជុំនេះ ក៏មានរាយការណ៍ពីសកម្មភាពកន្លងមក ដែលតំបន់មួយៗបានអភិវឌ្ឍ នៅក្នុងសមាគមកាយឫទ្ធិនារីរបស់ខ្លួន ។

លោកជំទាវបានបន្តថា សម្រាប់កិច្ចប្រជុំទាំងអស់នេះ គឺបានផ្ដោតសំខាន់ក្នុងការផ្ដល់សិទ្ធិដល់យុវតី ដើម្បីនាំយកសំឡេងរបស់ពួកគេបង្ហាញទៅក្នុងកិច្ចប្រជុំ ថាចង់បានអ្វី ក៏ដូចជាជួយដោះស្រាយសំណូមពររបស់ពួកគេ ។

គួរបញ្ជាក់ថា នៅឆ្នាំ២០២៦នេះ កម្ពុជាបានទទួលសិទ្ធិធ្វើជាម្ចាស់ផ្ទះ នៃមហាសន្និបាតកាយឫទ្ធិនារីពិភពលោក (WAGGGS) លើកទី៣៩ និងកិច្ចប្រជុំប្រចាំឆ្នាំរបស់សមាគម The Olave Baden-Powell Society (OB-PS) លើកទី៤២ នៅក្នុងខេត្តសៀមរាប ចាប់ពីថ្ងៃទី១៤ ដល់ទី១៩ ខែមិថុនា ឆ្នាំ២០២៦។ ព្រឹត្តិការណ៍នេះ មានការចូលរួមមកពីប្រទេសជាង១០០ នៃតំបន់ទាំង៥ លើពិភពលោក ហើយមានអ្នកចូលរួមជាង៦០០នាក់។ មហាសន្និបាតកាយឫទ្ធិនារីពិភពលោក គឺជាវេទិកាកំពូល និងជាអង្គភាពសម្រេចចិត្តខ្ពស់បំផុតរបស់សមាគមកាយឫទ្ធិនារីពិភពលោក (World Association of Girl Guides and Girl Scouts-WAGGGS) ដែលរៀបចំរៀងរាល់ ៣ឆ្នាំម្ដង ។

មហាសន្និបាតកាយឫទ្ធិនារីពិភពលោក គឺមានប្រមូលផ្ដុំថ្នាក់ដឹកនាំ និងប្រតិភូពីបណ្ដាប្រទេសជុំវិញពិភពលោក ដើម្បីរួមគ្នាពិភាក្សា ពិនិត្យ និងអនុម័តគោលនយោបាយសំខាន់ៗ កំណត់ទិសដៅយុទ្ធសាស្ត្រ ព្រមទាំងពង្រឹងបណ្ដាញសហប្រតិបត្តិការអន្តរជាតិ សម្រាប់ការអភិវឌ្ឍចលនាកាយឫទ្ធិនារី និងការផ្ដល់អំណាចដល់កុមារី និងយុវតី៕ អត្ថបទ៖ បាន សុខរិទ្ធិ